АҚШ Венесуэла президенти Николас Мадурони ўғирлаш учун унинг учувчисини ёллашга уринди. Аммо режа амалга ошмади. Бу ҳақда Associated Press хабар берди.
АҚШнинг амалдаги ва собиқ расмийлари ҳамда Венесуэла мухолифатининг бир вакили маълумотни тасдиқлади. Президент учувчисини ёллаш режаси 2024 йил апрель ойида ишлаб чиқилган. Ўша пайтда АҚШ Ички хавфсизлик вазирлигининг 50 ёшли агенти Эдвин Лопес АҚШнинг Доминикан Республикасидаги элчихонасида атташе бўлиб ишлаган.
Унга Мадуро билан боғлиқ иккита қиммат самолёт — Dassault Falcon 2000EХ ва Dassault Falcon 900EХ Санто-Домингодаги аэропортлардан бирида таъмирланаётгани хабар қилинган. Лайнерларга беш нафар учувчи, жумладан, бош учувчи генерал Битнер Виллегас ҳамроҳлик қилган.
АҚШ агентлари учувчиларни сўроқ қилган, ўзларини гўёки Мадуро ёки бошқа юқори лавозимли Венесуэла амалдорлари билан алоқасидан бехабар бўлгандек тутган. Улар охирги бўлиб Виллегас билан суҳбатлашган.
Суҳбат охирида Лопес учувчига катта мукофот эвазига Мадурони қўлга олиш мумкин бўлган жойга олиб боришни таклиф қилган. Учувчига жойни ўзи танлаш таклифи берилган. Вариантлар орасида Доминикан Республикаси, Пуэрто-Рико ёки Гуантанамо кўрфазидаги АҚШ ҳарбий базаси бўлган.
Венесуэлалик учувчи бунга аниқ жавоб бермаган, бироқ Лопесга телефон рақамини қолдирган. Агентлар буни “яхши сигнал” деб билган. Учувчиларга Венесуэлага қайтишга рухсат берилган, аммо самолётлар ушлаб қолинган. Кейинчалик бу учоқлар мамлакатга қарши санксиялар режими доирасида мусодара қилинган.
- Лопес 16 ой давомида Вилегас билан хат ёзишиб, уни Мадурони топширишга кўндирмоқчи бўлди
У 2025 йил июлда нафақага чиққач ҳам учувчи билан алоқани давом эттирган. Август ойида АҚШ Мадурони қўлга олиш учун қўйилган мукофотни 50 миллион долларга оширгач, Лопес бу ҳақдаги маълумотни Виллегасга юборган. Аммо тез орада учувчи жавоб беришни тўхтатган.
Агентлик манбаларига кўра, режа барбод бўлгач, агент ва Мадурога қаршилар Венесуэла раҳбарини ғазаблантириш йўлини излашга қарор қилган. 19 сентябрь куни Трамп маъмуриятининг собиқ расмийси Маршалл Биллингсли, Мадуро мухолифларига яқин шахс, Виллегасни туғилган куни билан табриклаган. У генералнинг Доминиканда Лопес билан суҳбатлашаётган пайтда олинган суратини жойлаштирган, расмда агент сурати кесиб ташланган.
Associated Press’нинг таъкидлашича, пост Мадуронинг самолёти Каракасдан учиб кетишидан бир дақиқа олдин жойлаштирилган. 20 дақиқадан сўнг самолёт кутилмаганда аэропортга қайтиб келган.
Биллингслининг пости Венесуэла ижтимоий тармоқларида катта шов-шувга сабаб бўлган. Мадуронинг рақиблари учувчига сўроқ учун ортга қайтиш буюрилганини тахмин қилган. Бошқалар эса уни қамоққа олишлари мумкинлигидан хавотирга тушган.
Бир неча кун Виллегасдан дарак бўлмаган. 24 сентябрда у венесуэлалик учувчиларнинг садоқати ва сотилмаслиги ҳақида ҳикоя қилувчи тарғибот телекўрсатувида кўринган.
Associated Press ўз мақоласида учувчини ёллашга уринишни жосуслик триллерига ўхшатади.
“Кенгроқ маънода бу схема АҚШ йиллар давомида Мадурони ағдаришга қанчалик қаттиқ ва кўпинча бепарволик билан ҳаракат қилганини кўрсатади”, дея таъкидлайди агентлик.
