Аргентинада “Радикал фуқаролик иттифоқи” (UCR) партиясидан парламентга номзод Эрнан Дамиани дебат давомида юрак хуружидан вафот этди. Бу ҳақда Испаниянинг 20minutos нашри хабар берди.
66 ёшли сиёсатчи бошқа парламент номзодлари билан Dolar Blue телекўрсатувида иштирок этаётган бўлган. Жонли эфирида Эрнан Дамианининг аҳволи ёмонлашган. Эфир бошланганидан бир неча дақиқа ўтгач, у ҳолсизланиб, полга йиқилган. Уни зудлик билан шифохонага етказишган. Бироқ шифокорлар Дамианининг ҳаётини сақлаб қололмаган.
Economis маълумотига кўра, Дамиани узоқ йиллар давомида тамаки чекиб келган. Марҳум 40 йилдан ортиқ вақт давомида Мисионес провинциясининг сиёсий ҳаётида фаол иштирок этган, бир неча бор маҳаллий парламент депутати этиб сайланган.
Кейинчалик у Миллий Конгрессда жиноят ҳуқуқи бўйича комиссияга раҳбарлик қилган. У 26 октябрь куни бўлиб ўтадиган сайловларда иштирок этиши керак эди. Primera Edision нашрига кўра, Дамианини партиядаги энг нуфузли шахслардан бири бўлган, у бир неча марта UCR раҳбари лавозимини эгаллаган.
Август ойида Сербияда вазир жонли эфир вақтида инсультга учраган эди. Ҳодиса Давлат инвестициялари вазири Дарко Глишичнинг Pink телеканалининг эрталабки дастурида иштирок этаётганида юз берган. Шундан сўнг сиёсатчи зудлик билан шифохонага олиб кетилганди.
