Аргентина терма жамоасининг Хитойда ўтказилиши кутилаётган ўртоқлик учрашувлари бекор қилинди. Терма жамоанинг сентябрь-октябрь ойларидаги FIFA кунлари доирасидаги бўлажак ўртоқлик учрашувлари юзасидан тарқалган миш-мишларга аниқлик киритилди. Мамлакат футбол федерацияси ижтимоий тармоқлардаги саҳифасида қуйидагича баёнот берди:
“Душанба куни АФА Лионель Скалони жамоасининг сентябрь ва октябрь ойларидаги FIFA кунларида ўтказадиган ўртоқлик учрашувларини эълон қилади”.
21 сентябрдан 6 октябргача бўлиб ўтиши режалаштирилган ушбу йиғин доирасида Аргентина терма жамоаси икки ёки учта учрашув ўтказиши кутилмоқда. Журналист Эстебан Эдулнинг маълум қилишича, ўйинлар Кордова шаҳрида ва “Ривер Плейт” клубига қарашли “Монументал” стадионида бўлиб ўтиши мумкин.
Учрашувлар эълон қилинишининг кечикишига АФАнинг FIFA жавобини кутаётгани сабаб бўлган. Аргентина футбол федерацияси мазкур баҳслар А тоифасидаги халқаро учрашувлар сифатида тан олиниши ёки олинмаслиги масаласига аниқлик киритишни кутмоқда.
Бу масала айниқса Жаҳон чемпионати финалидаги воқеалар ортидан жазоланган футболчилар учун муҳим. Чунки А тоифасидаги учрашувлар дисквалификация муддатини ўташда ҳисобга олиниши мумкин.
Агар FIFA дисквалификация муддатларини камайтириш учун ўртоқлик учрашувларини мамлакат ташқарисида ўтказишни талаб қилса, Аргентина терма жамоаси бошқа давлатда ҳам майдонга тушиши мумкин.
Жаҳон чемпионати финалида юз берган воқеалар сабаб Леандро Паредес 10 та, Ноэл Молина 7 та, Тиаго Алмада эса 1 та учрашувга дисквалификация қилинган.
Бугун, 7 август куни Аргентина терма жамоасининг сентябрь-октябрь ойларида нечта ўртоқлик ўйини ўтказиши, шунингдек, рақиблари расман маълум қилинади. Дастлабки маълумотларга кўра, “Албиселесте”нинг рақиблари Марказий Америка терма жамоалари бўлиши кутилмоқда.
Аввал Аргентина терма жамоасининг Хитойда учрашувлар ўтказиши ҳам режалаштирилган эди. Ушбу сафар давомида Ўзбекистон миллий терма жамоаси ҳам Лионель Скалони бошқарувидаги жамоага қарши баҳс олиб бориши кутилаётганди. Бироқ Лионель Мессининг терма жамоадаги фаолиятини якунлагани ортидан бу вариант амалга ошмади.
