АҚШ президенти Дональд Трамп Украина раҳбари Владимир Зеленский билан бўлган учрашув чоғида, ҳозирча Украинага узоқ масофага учадиган “Tomahawk” қанотли ракеталарини етказиб бериш нияти йўқлигини айтган.
Бу ҳақда Axios нашри манбаларига таяниб хабар берди. Манбалардан бири учрашув осон ўтмаганини, Трамп эса қаттиққўл бўлганини таъкидлаган. Яна бир манбанинг сўзларига кўра, учрашув давомида Трамп бир неча кескин баёнотлар қилган ва айрим пайтларда суҳбат анча ҳиссий тус олган.
Шу билан бирга, АҚШ президенти учрашувдан сўнг ўтган мулоқотни қизиқарли ва самимий бўлганини айтган. У Киев ва Москва томонларини урушни тўхтатиш ва мавжуд ҳолатда келишувга эришишга чақирган.
Ўз навбатида, Зеленский АҚШ президенти билан учрашувдан сўнг “Tomahawk” ракеталари етказиб берилишига умид сақлаётганини айтган.
“Яхши томони шуки, президент Трамп ‘йўқ’ демади, аммо бугун у ‘ҳа’ ҳам демади”, — деган Украина раҳбари NBC телеканалига берган интервьюсида.
