Мадагаскар президенти Андри Ражуэлина ҳарбийлар зўравонлик ва ноқонуний йўл билан ҳокимиятни эгаллашга ҳаракат қилаётганини маълум қилди. Бу ҳақда The Guardian хабар берди.
Мамлакатда аҳоли норозилик намойишлари ўтказаётгани ҳақида маълум қилинганди. Мазкур намойишларга элита ҳарбий бўлинма – Capsat кучлари ҳам қўшилган. Таъкидланишича, ҳозирда улар армияни ўз назоратига олиб, ҳукуматни эгаллаб олишга ҳаракат қилмоқда. Айнан ушбу бўлинма 2009-йилда амалдаги президент Ражуэлинани ҳокимиятга тепасига олиб келган эди.
Норозилик намойишлар ва ҳарбийлар аралашуви
Намойишлар 25 сентябрда сув ва электр тақчиллигига қарши бошланган эди. Кейинчалик эса президентнинг истеъфоси, коррупцияга барҳам бериш ва сиёсий тизимни бутунлай янгилаш талаб қилинган. Шундан сўнг, мамлакатда ҳукумат тарқариб юборилган. Намойишларга асосан ёшлар етакчилик қилмоқда (Z авлоди). Ҳаракат Индонезия ва Непалда бўлган ёшлар норозиликларидан илҳомланган тарзда бошланган.
Capsat ҳарбийлари 11 октябрь куни пойтахт Антананаривуда жойлашган ўз базасини тарк этиб, минглаб намойишчилар билан бирга норозиликнинг рамзий нуқтаси бўлган 13 май майдонига йўл олган.
Capsat армияни назоратга олди
Capsat вакиллари 12 октябрь куни маҳаллий ОАВга видео мурожаат йўллаб, армияни ўз назоратига олганини эълон қилган. Шундан сўнг Capsat раҳбари генерал Демостен Пикулас армияда бош қўмондон сифатида тайинланган. Маросимда мудофаа вазири ҳам иштирок этиб, уни қўллаб-қувватлашини билдирган.
“Сўнгги кунларда воқеалар кутилмаган тус олди. Армиянинг вазифаси – мамлакатда тинчликни тиклаш”, деган генерал Пикулас.
Бироқ у президент Ражуэлинанинг истеъфосини ҳақидаги саволга жавоб бермаган. Президент Ражуэлина мамлакат ичкарисида экани ва вазиятни бошқараётганини билдирган. Бош вазир Рупҳин Фортунат Зафисамбо эса ҳукумат барча томонлар — ёшлар, касаба уюшмалари ва ҳарбийлар билан мулоқотга тайёр эканини таъкидлаган.
БМТ маълумотига кўра, сентябрь ойида бошланган норозиликларда камида 22 киши ҳалок бўлган. Ражуэлина эса ўтган ҳафтада бу статистикани инкор этиб, атиги 12 нафар талончи ва бузғунчи ҳалок бўлганини айтган.
Мамлакатда вазият жиддий
Мадагаскар — дунёдаги энг камбағал мамлакатлардан бири. Жаҳон банки маълумотига кўра, 2024-йилда аҳоли жон бошига ялпи ички маҳсулот атиги 545 долларни ташкил этган. Шунингдек, давлат Transparency International'нинг коррупция индексида 180 та мамлакат ичида 140-ўринда қайд этилган.
Айни пайтда норозиликлар давом этмоқда. Кўчаларда “Миала Ражоэлина!” (Ражуэлина кецин!) деган ҳайқириқлар янграмоқда. Аммо баъзилар ҳарбийлар ва уларга қўшилган сиёсатчиларни эҳтиёткорликка чақирмоқда.
