Мадриднинг “Реал” клуби бразилиялик ҳужумчи Виниусис Жуниорни ёзги трансфер ойнасида сотиб юбориши мумкин. Бу ҳақда Diario Sport нашрига таяниб Euro-Football хабар берди.
Манбага кўра, клуб раҳбарияти футболчини бу борада огоҳлантирган. Агар у яқин кунлар ичида клуб билан янги шартномани имзоламаса, ёзда бошқа жамоага трансфер қилинади.
Винисиус ҳамда раҳбарият ўртасидаги келишмовчиликлар узоқ вақтдан бери ОАВ эътиборида бўлиб турибди. Ҳужумчи жамоанинг энг кўп маош оладиган футболчиларидан бирига айланмоқчи. Бироқ мадридликлар футболчининг талабларини қаноатлантирмоқчи эмас. Бразилиялик форвард ҳозирда йилига 20 миллион евро миқдорида маош олади.
Аввалроқ Виниусис жамоани январь ойида ҳам тарк этиши мумкинлиги ҳақида хабарлар чиққан эди. Жумладан унга Саудия Арабистонининг бир қанча клублари таклиф тайёрлаган. Харидорлар футболчига йилига умумий қиймати 1 миллиард еврога тенг бўлган 5 йиллик шартнома таклиф қилгани айтилганди.
Маълумот учун, жорий мавсум 25 ёшли футболчи барча мусобақалар доирасида жами 10 та ўйинда майдонга тушиб, ўз ҳисобига 5 та гол ҳамда 4 та голли узатма ёздириб қўйган. Унинг “Реал” билан шартномаси 2027 йил июнь ойига қадар амал қилади. Transfermarkt портали ҳужумчининг қийматини 150 миллион еврога баҳолаган.
