Саудия Арабистонининг “Ал-Аҳли” клуби Мадриднинг “Реал” жамоаси билан ҳужумчи Винисиус Жуниорнинг трансфери бўйича тўғридан-тўғри музокаралар олиб бормоқда. Бу ҳақда Indykaila News нашри ўзининг X (собиқ Twitter) саҳифасида хабар берди.
Манбага кўра, Саудия Арабистони клуби 25 ёшли бразилиялик футболчининг трансфери учун “қироллик клуби”га 300 миллион фунт стерлинг (тахминан 345 миллион евро) таклиф қилишга тайёр. Агар Винисиус “Реал” билан 2027 йил 30 июнда якунланадиган шартномасини узайтира олмаса, трансфер 2026-йилнинг ёзида амалга ошиши мумкин.
Аввалроқ, оммавий ахборот воситаларда Винисиус ва “Реал Мадрид” раҳбарияти янги шартнома бўйича келиша олмаганини ҳақида хабарлар тарқалган эди. Чунки бразилиялик форвард клубнинг энг кўп маош оладиган футболчига айланишни истамоқда. Аммо раҳбарият унинг истакларини қаноатлантирмоқчи эмас.
Маълумот учун, жорий мавсум Винисиус Жуниор барча мусобақалар доирасида жами 10 та ўйинда майдонга тушиб, ўз ҳисобига 5 та гол урган ва 4 та голли узатма ёздириб қўйган. Transfermarkt портали футболчининг қийматини 150 миллион еврога баҳоламоқда.
