АҚШ президенти Дональд Трамп Тайванга 400 миллион долларлик ҳарбий ёрдам ажратилишини блоклади. Бу ҳақда манбаларга таяниб, The Washington Post хабар берди.
Тегишли қарор Хитой билан эҳтимолий савдо келишуви ва Хитой етакчиси Си Цзиньпин билан бўлиб ўтадиган саммит олдидан қабул қилинди. Трамп бевосита ёрдам ўрнига Тайван қуролларни АҚШдан тижорат шартномалари орқали сотиб олишини хоҳлайди. Бунгача орол давлати қурол-яроғни асосан ҳарбий ёрдам дастурлари доирасида олган.
АҚШдаги айрим амалдорлар Трамп маъмуриятининг бу қадамини ма’қулламаган. Масалан, ҳозирда Америка тадбиркорлик институтида фаолият юритаётган собиқ Пентагон ходими Ден Блюментал буни танқид қилган. У “АҚШнинг ҳозир айнан газ педалидан оёғини олиши учун мутлақо ноўрин пайт” деб баҳолаган.
Қарор қурол-яроғ етказиб бериш жараёнини кечиктириши ва Тайваннинг харажатларини ошириши мумкин. Нашр буни Вашингтоннинг орол хавфсизлигини таъминлаш борасидаги ёндашувини қайта кўриб чиқаётганидан далолат сифатида баҳолаган.
1949-йилда ўз мустақиллигини эълон қилган Тайван 1980-йиллардан бери Хитой илгари сураётган “бир мамлакат, икки тизим” моделини рад этади. Вашингтоннинг Тайбей билан дипломатик алоқалари йўқ. Аммо АҚШ 1979-йилда қабул қилинган “Тайван билан муносабатлар тўғрисида”ги қонун доирасида унга ўзини ҳимоя қилиш учун қурол сотади.
