Беларусь АҚШ президенти Дональд Трампнинг сўрови билан 52 нафар маҳбусни афв қилди ва уларни Литвага юборди. Бу ҳақда CNN хабар берди.
АҚШ маъмурияти бунинг эвазига Беларусь давлат авиакомпанияси Belavia’га қарши санксияларни қисман енгиллаштиришини маълум қилган. Таъкидланишича, мамлакат президенти Александр Лукашенко Трамп топшириғи билан Минскга келган ва АҚШ расмийлари билан учрашган. Учрашувда сиёсий маҳбуслар озод қилиниши ва минтақавий хавфсизлик масалалари, жумладан Беларусдан НАТО давлатларига амалга оширилаётган ноқонуний миграция муаммоси муҳокама қилинган.
Вашингтон расмийлари маҳбусларнинг озод этилишини олқишлаб, шундай муносабат билдирган:
“Беларусьда қолаётган 1 300 га яқин сиёсий маҳбусни озод қилиш устида ишлашни давом эттирамиз”.
Маълум қилинишича, озод қилинганлар орасида 14 хил миллат вакиллари — литвалик, латвиялик, полшалик, немис, француз ва британияликлар бор. Human Rights Watch ва мустақил Беларусь ОАВси таниқли сиёсий маҳбуслар Микола Статкевич, Уладзимир Мацкевич ва Элена Романаускиене ҳам озод қилинганини хабар қилмоқда.
“Президент Трампга — унга хушомад қилмоқчи эмасман, бу менга бегона — биринчи навбатда минтақамизда тинчлик учун қилаётган саъй-ҳаракатлари учун миннатдорлик билдирмоқчиман”, деган Лукашенко АҚШ расмийлари билан учрашув бошланишида.
