Апрель ойида “Толибон” етакчиси давлат хизматчиларининг 20 фоизини қисқартиришни буюрган, май ойида эса уларнинг маошларини камайтиришга топшириқ берганди. Бироқ барча вазирликлар бу кўрсатмага бўйсунмаган. Август ойи охирида Amu TV билан гаплашган манбалар Ички ишлар вазири Сирожиддин Ҳаққоний ўз одамлари ва яқин тарафдорларини сақлаб қолиш учун қисқартиришларга қаршилик кўрсатганини айтган.
Натижада Молия вазирлиги норозилик сифатида Ички ишлар вазирлиги ходимларига маош тўлашни кечиктирган. Ҳаққоний бунга жавобан қисқартиришларни қабул қилишдан кўра маошларни шахсан ўз маблағидан тўлашга тайёрлигини билдирган, дейди манбалар. Ҳозирда Ички ишлар вазирлигида маош масаласи ҳал этилмаган бўлса-да, Молия вазирлиги яқинда Мудофаа ва Таълим вазирликлари ходимларига кечиктирилган тўловларни амалга оширган.
“Ҳаққонийнинг қаршилиги унинг ўз таъсир доирасини ва ички ҳокимиятдаги мавқеини сақлаб қолишга интилаётганини кўрсатмоқда”, дейди AmuTV суҳбатдошлари.
