Марокаш терма жамоаси октябрь ойида Ўзбекистон билан ўртоқлик учрашуви ўтказиши режалаштирилмоқда. Бу ҳақда маҳаллий Morocco World News нашри хабар берди.
Унга кўра, учрашув ФИФА кунлари доирасида, 6–14 октябрь оралиғида Марокашнинг Танжер шаҳридаги “Гранд” стадионида ўтказилиши мумкин. Беллашув дастлаб “атлас шерлари”нинг Эритреяга қарши режалаштирилган ўйинининг ўрнига ташкил этилади.
Ўзбекистон жаҳон рейтингида 55-ўринда, Осиёда эса олтинчи ўринда туради. Қолаверса, жамоа аллақачон мундиал масаласини ҳал қилган. Шу боис Марокаш футбол федерацияси ЎФАга расмий таклиф юбормоқчи. Шу билан бирга, ўйин 75 минг томошабинга мўлжалланган ва яқинда қайта таъмирдан чиққан Танжердаги “Гранд” стадионининг қайта очилишига тўғри келади. Ушбу арена илгари Испания Суперкубоги, Клублар ўртасидаги жаҳон чемпионати ва 2023-йилда Бразилияга қарши ўртоқлик учрашувига ҳам мезбонлик қилган.
Маълумот учун, Марокаш терма жамоаси 2022 йил Қатар майдонларида ўтган Жаҳон чемпионатининг ярим финалчиси ҳисобланади. Улар финал остонасида Францияга (0:2) имкониятни бой берган бўлса, 3-ўрин учун кечган беллашувда Хорватияга мағлуб бўлган (1:2).
Эслатиб ўтамиз, Ўзбекистон терма жамоаси 13 октябрь куни Малайзиянинг Куала Лумпур шаҳрида Уругвайга қарши майдонга тушади.
