Россия Федерацияси президенти Владимир Путин Украина раҳбари Владимир Зеленский билан учрашувни ҳеч қачон рад этмаганини, аммо бундай учрашувнинг фойдаси борлигига шубҳа билдирмоқда. Бу ҳақда у Пекинда бўлиб ўтган матбуот анжуманида маълум қилган.
“Жаноб Зеленский билан учрашувга келсак, мен бундай имкониятни ҳеч қачон инкор этмаганман. Лекин бунинг бирор маъноси борми?”, деди Путин.
Шунингдек, Россия раҳбари агар Украина президенти музокаралар ўтказишни хоҳласа, Москвага келсин, учрашувимиз ўша ерда бўлади, деб таъкидлаган.
Путиннинг айтишича, учрашувлар фақат ижобий натижа кафолатланган тақдирдагина ўтказилиши мумкин.
“Айтганча, АҚШ президенти Доналд Трамп мендан шундай учрашув ўтказишни сўраган эди. Мен “Ҳа, бу мумкин”, деб жавоб берганман. Охир-оқибат, агар Зеленский тайёр бўлса, Москвага келсин, шунда бундай учрашув амалга ошади”, деди Россия президенти.
Бундан аввал Доналд Трамп АҚШ, Россия ва Украина ўртасида тинчликка оид уч томонлама учрашув албатта ўтказилишини айтганди. Бироқ у Владимир Путин ва Владимир Зеленскийнинг икки томонлама учрашув ўтказишига ишонч билдирмаган.
