АҚШ Олий суди президент Дональд Трамп маъмуриятига Венесуэла, Гаити, Куба ва Никарагуадан келган 500 мингдан ортиқ муҳожирнинг Қўшма Штатлар ҳудудида қонуний бўлиш ҳуқуқини бекор қилишга рухсат берди. Бу ҳақда суд қарорида маълум қилинди.
Таъкидланишича, Олий суд ижро ҳокимиятининг АҚШнинг 46-президенти Жо Байден маъмурияти томонидан жорий этилган тегишли дастурни бекор қилиш тўғрисидаги илтимосномасини қабул қилган.
Илгари қуйи инстанция судлари Вашингтоннинг Лотин Америкасининг тўртта давлатидан келган 532 минг муҳожирга берилган қонуний мақомни бекор қилиш ҳаракатини рад этган эди. Судлар АҚШ Ички хавфсизлик вазирлиги ҳар бир аниқ ҳолат бўйича зарур таҳлилни ўтказмаган, деб ҳисоблаган. Шу билан бирга, Олий суд қарори бошқа давлатлар, жумладан Афғонистон ва Украина фуқароларининг ҳуқуқий мақомини ўзгартирмайди.
Венесуэла, Гаити, Куба ва Никарагуадан келган муҳожирлар АҚШга кириш учун олдиндан ариза топширишлари ва Қўшма Штатлардаги кафил топиши шарти билан икки йилга ишлаш учун рухсат олишлари мумкин эди. Бу дастур республикачилар томонидан кескин танқид қилинган.
Олий суд миграция масаласида иккинчи марта Трамп томонини олмоқда. Аввалроқ қуйи инстанция судининг ижро ҳокимиятига 300 мингга яқин венесуэлаликларни мамлакатдан чиқариб юборишни тақиқловчи қарори бекор қилинган эди.
Илгари АҚШ ҳокимияти, шу жумладан ички хавфсизлик вазири Кристи Ноэм, мигрантлар фуқаролик олиш учун курашишига асосланган реалити-шоу яратиш ғоясини илгари сурган эди. Лойиҳага кўра, иштирокчилар Сан-Франциско яқинидаги конларда ишлаш, НАСАда ракета йиғиш ва уни космосга учиришгача бўлган турли хил ғайриоддий вазифаларни бажаришлари керак бўларди.
