Исроил мудофаа армиясининг барча мунтазам пиёда ва зирҳли бригадалари Ғазо секторига жойлаштирилди. Бу ҳақда The Times of Israel хабар берди.
Маълум қилинишича, Исроил ҲАМАСга қарши ҳужумни янада кучайтиришга тайёрланмоқда. “Голани”, “Гивати”, “Коммандос”, “Кфир” ва бошқа бригадалардан ташқари Ғазо секторига захира бўлинмалари ҳам киритилган.
Бунгача Ғазода ўн минглаб ҳарбийлардан иборат бешта дивизия ҳаракат қилаётганди. 24 май куни Исроил армияси юздан ортиқ нишонга зарба берилганини маълум қилган.
Ҳарбийлар ҲАМАС томонидан фойдаланилаётган инфратузилмалар нишонга олинганини билдирган. Ғазо соғлиқни сақлаш вазирлиги эса Исроилнинг ҳаракатлари оқибатида 80 дан ортиқ одам ҳалок бўлганини эълон қилган. Исроил 18 март куни ҳужумни кучайтирганидан бери секторда 3747 киши ҳалок бўлган.
Исроил май ойи ўрталаридан бери Ғазодаги гаровга олинганларни озод қилиш ва 2023 йил кузида мамлакатга ҳужум қилган ҲАМАСни йўқ қилиш учун янги йирик ҳужум уюштирмоқда. Бош вазир Биньямин Нетаньяху Исроил эксклавнинг бутун ҳудуди устидан ҳарбий назорат ўрнатиш ниятида эканини айтганди.
Ғазодаги оғир гуманитар вазият туфайли Европа Иттифоқи яҳудий давлати билан муносабатларни қайта кўриб чиқишга рухсат берган. Британия, Канада ва Франция эса Исроилга санкциялар билан таҳдид қилганди.
