“Барселона” футболчиси Ламин Ямал кейинги мавсумдан 10-рақам остида майдонга тушади. Бу ҳақда Managing Barca нашрига таяниб Championat хабар берди.
17 ёшли футболчи ҳозир 19-рақам остида ўйнамоқда, аммо Ламин 13 июль куни 18 ёшга тўлади ва каталонияликлар билан узоқ муддатли шартнома имзолайди. Шундан кейин футболчи ўзининг янги рақамини қабул қилиб олиши айтилмоқда. Олдин бу рақамдан Лионель Месси, Роналдиньо, Диэго Марадона каби футбол афсоналари фойдаланган. Ҳозирда 10-рақам Ансу Фатига тегишли.
Манбага кўра, Ямал “Барселона” билан янги битим бўйича келишувга эришган. Унда футболчини сотиб олиш учун белгиланган товон пули миқдори 1 миллиард еврони ташкил қилади.
Маълумот учун, Ямал жорий мавсум “Барселона” сафида 54 ўйинида майдонга тушиб, ўз ҳисобига 18 та гол ва 25 та голли узатма ёздириб қўйган.
