Каталониянинг “Барселона” клуби Испания қироллик футбол федерацияси раҳбариятига мурожаат қилиб, жамоа вингери Ламин Ямални ЖЧ-2026 нинг дастлабки икки ўйинига жалб этмасликни сўради. Sport.es нашрининг хабар беришича, футболчи Испания чемпионатининг 33-туридан ўрин олган “Сельта”га қарши баҳсда жароҳат олган ва биринчи бўлим якунланмасидан майдонни тарк этишга мажбур бўлган эди.
Клуб мутасаддилари футболчининг саломатлигидан жиддий хавотирда ва унинг мундиал бошлангунга қадар тўлиқ тикланишини истамоқда. Агар Ямал Кабо-Верде ва Саудия Арабистонига қарши учрашувларни ўтказиб юборса, бу унинг жароҳати оғирлашиб кетиш хавфини камайтиради. Шу тариқа, Ламин Ямалнинг Жаҳон чемпионатидаги дебюти Уругвайга қарши ўйинга тўғри келиши мумкин, бироқ якуний қарор футболчининг тикланиш жараёнига қараб қабул қилинади.
Маълумот учун, Ламин Ямал жорий мавсум “Барселона”нинг энг асосий ўйинчиси бўлиб келаётган эди. У барча турнирлар доирасида жами 45 та учрашувда майдонга тушиб, 24 та гол ва 18 та голли узатмага муаллифлик қилди. “Кўк-анорранглилар” Испания Ла Лигасининг 33-тури доирасидан сўнг 85 очко билан турнир жадвалида 1-ўринни эгаллаб турибди.
Эслатиб ўтамиз, қуръа натижаларига кўра, Испания терма жамоаси “H” гуруҳидан жой олган. “Қизил фурия” гуруҳ босқичида Кабо-Верде, Саудия Арабистони ҳамда Уругвай терма жамоаларига қарши баҳс олиб боради.
