Мадриднинг “Реал” клуби ҳужумчиси Килиан Мбаппе Ла Лиганинг 31-туридаги “Алавес”га қарши ўйинда (1:0) тўғридан тўғри қизил карточка олди. Испаниянинг етакчи ОАВларида франциялик футболчи бир неча ўйинга дисквалификация қилиниши мумкинлиги айтилмоқда.
Учрашув бош ҳаками Сезар Сото Градо Килианнинг майдондан четлатилиши ҳақидаги баённомада уни “кураш пайтида рақиб оёғига ҳаддан ташқари куч билан босгани” сабабли майдондан четлатилганини ёзди.
Ушбу ҳолатда Мбаппе 12 ўйинлик дисквалификация билан жазоланиши мумкин эди, аммо мавжуд протоколга кўра, Килиан атиги 3 ўйинга четлатилиши эҳтимоли юқори. Испания матбуотида бу қарор учрашув бош ҳакамининг ҳисоботи асосида қабул қилиниши ҳақида ёзилди. Агар ҳодиса “айниқса қўпол хатти-ҳаракатлар” сифатида таснифланса, Мбаппе нафақат кейинги бир неча турни, балки муҳим “Эл-Класико”ни ҳам ўтказиб юбориши мумкин.
Маълумот учун, Испания кубоги финал баҳси 26 апрель куни ўтказилади. Унда “Реал” “Барселона”га қарши майдонга тушади.
