Европа футбол ассоциациялари иттифоқи (УЕФА) 2025 йил 12 март куни бўлиб ўтган Чемпионлар Лигаси 1/8 финал жавоб ўйинидан сўнг “Реал Мадрид” футболчилари – Антонио Рюдигер, Килиан Мбаппе, Дани Себальос ва Винисиус Жуниорнинг хатти-ҳаракатларини текшириш учун интизомий комиссия тузди.
Ушбу баҳсда “Реал” “Атлетико Мадрид” устидан пенальтилар сериясида (4:2) ғалаба қозониб, чорак финалга йўл олган эди. Асосий вақт ва қўшимча бўлимларда Анчелотти шогирдлари 0:1 ҳисобида имкониятни бой берган бўлса-да, умумий ҳисоб 2:2 бўлди ва пенальтилар сериясида “қироллик клуби” устун келди.
Ўйин якунидан кейин “Реал” футболчилари “Атлетико” мухлисларига нисбатан номақбул ҳаракатлар қилгани айтилмоқда. Хусусан, Антонио Рюдигер бўйнини кесиш ишорасини кўрсатган, Дани Себальос ва Килиан Мбаппе мухлисларга нисбатан ҳақоратли имо-ишоралар қилган, Винисиус Жуниор эса клуб эмблемасини мухлисларга кўрсатиб, уларни янада ғазаблантирган.
УЕФА бу ҳолат бўйича этика ва интизом инспекторини тайинлади. Текширув натижасида футболчиларга жарима ёки дисквалификация каби санкциялар қўлланиши мумкин. Бу эса “Реал Мадрид”нинг чорак финалдаги ўйинларига таъсир қилиши эҳтимоли бор. Мадридликлар 8 ва 16 апрель кунлари Лондоннинг “Арсенал” жамоасига қарши майдонга тушиши режалаштирилган.
“Реал Мадрид” раҳбарияти футболчиларининг ҳаракатларини оқлашга ҳаракат қилмоқда. Клуб вакилларининг таъкидлашича, “Атлетико” мухлислари футболчиларга нисбатан провокацион ҳаракатлар қилган, ҳатто майдонга турли буюмлар улоқтирилган.
