Россиянинг Санкт Петербург шаҳрида ўзбекистонлик ошпазни дўппослаб, автомобилини ўғирлаб кетишди. Бу ҳақда 78.ru хабар берди.
Маълум қилинишича, ҳодиса 17 март куни Кимёгарлар кўчасида юз берган. Маҳаллий вақт билан соат 20:00 да уч нафар номаълум шахс Ravon машинасидан тушиб, ошпаз бўлиб ишлайдиган 27 ёшли Ўзбекистон фуқаросини қўллари ва таёқ билан урган. Шундан сўнг улар жабрланувчидан автомобиль калитни олиб, шу машинада қочиб кетган.
Дастлабки маълумотларга кўра, ҳодисага ишдаги можаро сабаб бўлган. Ҳужум қилганлар қидирилмоқда, улар ошпазнинг ҳамкасблари ва ватандошлари экани айтилмоқда. Ҳозирда жиноят иши қўзғатиш масаласи ҳал қилинмоқда.
Россияда январь ойида ҳам Ўзбекистон фуқаросига ҳужум қилиш билан боғлиқ ҳолат кузатилган эди. Ленинград вилоятида 19 ёшли ўзбекистонлик йигитга ўқ узилган. Жабрланувчи шахсан тиббий ёрдам пунктига мурожаат қилган. Унинг бош қисмида жароҳат қайд этилган. Шифокорлар йигитнинг бўйин қисмида ўқ жойлашганини аниқлаган. Жабрланувчи оғир аҳволда Александровск шифохонасига етказилган эди. Ўқ узган шахс эса қидирувга берилганди.
