Агар ҲАМАС гаровда ушлаб турилган исроилликларни 15 февраль куни тушгача озод қилмаса, Исроил Ғазо секторига ҳужумни қайта бошлайди. Бу ҳақда Исроил бош вазири Биньямин Нетаньяхуга таяниб, The Times of Israel хабар берди.
Нетаньяхунинг сўзларига кўра, ҲАМАС 10 февраль куни гаровга олинганларни қўйиб юбормаслик қарорини эълон қилиб, “битим шартларини бузган”.
“Агар ҲАМАС шанба куни тушгача гаровга олинганларни қайтармаса, ўт очишни тўхтатиш режими тугайди ва Исроил мудофаа армияси ҲАМАС мағлубиятга учрамагунча яна шиддатли жанглар олиб боради”, дея таҳдид қилди Нетаньяху.
Таъкидланишича, Исроил бош вазири 15 февраль куни айнан қанча гаровга олинганлар озод қилиниши кераклигига аниқлик киритмаган. Шу куни ўт очишни тўхтатиш тўғрисидаги битим шартларига кўра, гаровга олинган уч кишини озод қилиш кўзда тутилган эди.
Трамп ҳам ҲАМАСга таҳдид қилмоқда
АҚШ президенти ҲАМАС ҳаракатидан барча гаровдаги исроилликларни 15 февраль куни соат 12:00 гача озод қилишни талаб қилди. Агар улар озод этилмаса, “жаҳаннам бошланиши”ни таъкидлади.
Битталаб, иккиталаб, учталаб, тўртталаб эмас. Ҳаммаси бирдан. Биз ҳаммасини қайтармоқчимиз. Мен фақат ўз номимдан гапиряпман. Исроил ўз билганича иш тутиши мумкин, дея таъкидлади у.
Агар ҲАМАС шартларни бажармаса, Трамп Исроилга ташкилот билан тузилган сулҳни бекор қилишни тавсия қилмоқда.
ҲАМАС нега гаровга олинганларни беришни тўхтатди?
Фаластин ҳаракати Исроилни ўт очишни тўхтатиш тўғрисидаги келишувни бузганликда, жумладан, Ғазодаги фаластинликларга ҳаво ҳужумлари уюштирганликда айблаб, гаровга олинганларни озод қилиш келаси шанба кунига қолдирилишини айтган.
Сўнгги уч ҳафта давомида биз душман томонидан келишув шартларининг доимий равишда бузилишини кузатдик, деди ҲАМАСнинг ҳарбий қаноти ҳисобланмиш “Иззаддин ал-Қассам бригадалари” гуруҳи вакили Абу Убайда.
ҲАМАС шу муносабат билан15 февраль куни озод қилиниши кутилаётган асирларни Исроилга қайтаришни кейинги огоҳлантиришгача кечиктиришга қарор қилган. У Исроил келишув қоидаларига риоя қилиши ва сўнгги ҳафталарда етказилган зарарни қоплаши кераклигини таъкидлаган. Кейинги алмашинув шанба кунига белгиланган бўлиб, унда юзлаб фаластинлик маҳбуслар эвазига уч нафар исроиллик гаровга олинганларни озод қилиш режалаштирилганди.
Исроилни келишувни мунтазам равишда бузишда айблаган Абу Убайданинг таъкидлашича, айбловлар “кўчирилган фаластинликларга Ғазо шимолига қайтишга рухсат беришни кечиктириш, ҳаво ҳужумлари ва секторнинг турли ҳудудларини ўққа тутиш, шунингдек, келишувларга мувофиқ гуманитар ёрдам етказиб беришга кўмаклашишга қодир эмасликни ўз ичига олади”.
