АҚШда демократ конгрессмен Эл Грин президент Дональд Трампга қарши импичмент эълон қилишни таклиф этди. Бу ҳақда The Hill хабар берди.
“Президентга нисбатан импичмент ҳаракати бошланди. Мен президент таклиф этган ва содир этган тубан хатти-ҳаракатлари учун унга қарши импичмент ҳужжатини тақдим этишимни эълон қиламан”, деди Эл Грин.
Конгрессменнинг сўзларига кўра, Оқ уй раҳбари Ғазо секторига оид режалари туфайли бунга лойиқ. Трамп АҚШ тарихида вакиллар палатасида иккита импичмент олган ягона президент ҳисобланади, бироқ иккала сафар ҳам сенаторлар томонидан оқланган.
Республикачилар конгресснинг иккала палатасида ҳам устунликка эга, шу учун Трампга импичмент эълон қилиниши даргумон.
Трамп: “АҚШ Ғазо секторини бошқаради”
АҚШ президенти Ғазо секторини “снос” майдончаси деб атаганди. У анклав аҳолисини турли мамлакатларга, жумладан, Иордания ва Мисрга кўчириб ўтказиш мумкинлигини айтган. У Қўшма Штатлар бу жараённи молиялаштирмаслиги, чунки харажатларни қоплашга Яқин Шарқ давлатларининг қурби етишини таъкидлаганди. Вашингтон эса минтақадаги ишлар учун жавобгар бўлади ва зарурат туғилганда у ерга ўз қўшинларини юбориши мумкинлигини айтган.
Саудия Арабистони ҳукумати ўз баёнотида фаластинликларни ўз ерларидан сиқиб чиқаришга қаратилган ҳар қандай уринишларни қабул қилмаслигини таъкидлаб, Фаластин давлати тузилмагунича Исроил билан муносабат ўрнатмаслигини эълон қилди.
ҲАМАС Трампнинг Ғазодаги фаластинликларни чиқариб юборишга чақирган даъватларини қоралаб, уларни “ўз еридан қувиш” деб атади.
Австралиянинг маҳаллий аҳолиси вакили бўлган сиёсатчи Лидия Торп Трампнинг Ғазони “эгаллаш” ҳақидаги фикрларини “этник тозалаш ва мустамлакачиликнинг очиқ чақириғи” деб баҳолади.
Амнестй International инсон ҳуқуқлари ташкилоти ўтган йилнинг ноябрь ойида Халқаро жиноий суд (ХЖС) Нетаньяхуни қамоққа олиш учун ордер берган бўлса-да, уни қамоққа олмасдан, АҚШ “халқаро одил судловга нисбатан нафратини намойиш этаётганини” билдирди.
АҚШда бир қатор демократлар Трампнинг режасини танқид қилди, демократ сенатор Крис Мерфи эса АҚШнинг Ғазога бостириб кириши минглаб америкалик аскарларнинг ҳалок бўлишига ва Яқин Шарқда ўн йиллаб давом этадиган урушга олиб келишини таъкидлади.
АҚШ етакчиси Ғазони “ўлим ва вайронагарчилик рамзи” деб атаган ва одамларнинг у ерга қайтишни исташининг ягона сабабини уларнинг бошқа борадиган жойи йўқлиги билан изоҳлаган.
