Керч бўғозида 15 декабрь куни мазут юкланган иккита “Волгонефть 212” ва “Волгонефть 239” танкерлари шикастланганди. Ҳодиса оқибатида нефть маҳсулотлари тўкилиши содир бўлган. Бунинг оқибатда 30 та дельфин нобуд бўлди.
Россиянинг дельфинларни қутқариш ва ўрганиш маркази “Delfа”нинг таъкидлашича, бу “катта эҳтимол билан мазутнинг тўкилиши билан боғлиқ”. Фавқулодда вазият юз берган пайтдан бошлаб, китлар ва дельфинлар каби китсимонлар туркумига мансуб жами 61 та жонзотнинг нобуд бўлиши кузатилган.
“Китсимонларнинг аксарияти ҳалокат юз берганидан кейинги дастлабки ўн кун ичида нобуд бўлган. Ҳозир ҳам денгиз уларни қирғоққа чиқаришда давом этмоқда”, дейилади марказ хабарида.
Россия ФВВ Краснодар ўлкасининг Анапа ва Темрюк туманлари қирғоқ чизиғи бўйлаб 96 минг тоннадан ортиқ ифлосланган қум ва тупроқ олиб ташлангани ҳақида хабар берди. Россия президенти Владимир Путин нефть тўкилишини “экологик фалокат” деб атаган.
Россия кемаларининг ҳалокати
15 декабрь куни Керч бўғозида мазут юкланган иккита “Волгонефть 212” ва “Волгонефть 239” танкерлари шикастланганди. Улардан бири чўкиб кетган, иккинчиси Таман порти яқинидаги қирғоқдан 18 м наридаги саёз жойга тўхтаган. Қутқарувчилар иккита кемадан 27 кишини эвакуация қилган, аммо улардан бири — 23 ёшли вахта матроси ҳалок бўлган. Шифохоналарга жами 11 киши ётқизилган, улардан 2 нафари оғир аҳволда эди.
Танкерлар жами 9,2 минг тонна мазут ташиган. Ҳодиса оқибатида нефть маҳсулотлари тўкилиши содир бўлган, Анапа ва Краснодар ўлкасининг бир қатор аҳоли пунктларида фавқулодда ҳолат режими жорий этилган.
Мутахассислар мазутнинг сизиб чиқиши Қора денгиз учун энг катта экологик фалокатга айланиши мумкинлигидан огоҳлантирган. Дастлабки маълумотларга кўра, денгизга 4,2 минг куб метрдан ортиқ нефть маҳсулотлари тўкилган бўлиши мумкин.
