Швейцария қишда Украина энергетика инфратузилмасини қўллаб-қувватлаш ва бошқа гуманитар эҳтиёжлар учун Киевга қўшимча 50 миллион доллар ажратади. Бу ҳақда Швейцария Ташқи ишлар вазирлиги хабар берди.
Унга кўра, маблағ энергия тизимини тиклаш, вайрон бўлган турар жой биноларини таъмирлаш ва гуманитар ёрдам кўрсатишга йўналтирилади. Хусусан, эҳтиёт қисмлари, ёқилғи етказиб бериш, энергия самарадорлигини оширишга йўналтирилган инвестициялар, электр узатиш линиялари учун ишлаб чиқариш ускуналари ва кабеллар етказиб бериш кўзда тутилган.
Янги ёрдам пакети билан Швейцария томонидан жорий қишда Украинани қўллаб-қувватлаш учун ажратилган маблағларнинг умумий миқдори қарийб 145 миллион долларга етади.
Умуман олганда, уруш бошланган 2022 йилдан бери Швейцария Украинага 500 миллион доллардан ортиқ ёрдам ажратган.
Аввалроқ АҚШ Украинага бир йилга етадиган қурол-яроғ юбориши хабар қилинганди.
“Биз аллақачон тақдим этган ва Байден администрацияси фаолияти якунлангунга қадар юбориладиган ресурслар Украинани 2025 йил охиригача уруш учун зарур бўлган қурол-яроғ билан таъминлайди”, деди АҚШ давлат департаменти вакили Метю Миллер.
АҚШнинг Киевга ёрдами икки асосий йўл билан амалга оширилади: Пентагон омборларидан ҳарбий мол-мулкни жўнатиш ташаббуси ва янги ускуналарни сотиб олишни назарда тутувчи УСAI дастури орқали.
Ҳозирги маъмурият Байденнинг муддати тугагунга қадар Украинага келишилган барча маблағларни ажратиш ниятида эканини бир неча бор эълон қилган. Мазкур сумма, тахминан, 9 миллиард долларга етади.
