“Миллион” жамоаси сардори Даврон Кабулов YouTube’дага “Daryo lifestayle” каналига берган интервьюсида ижтимоий тармоқларда негатив фикр билдираётган, жамоа саҳнада кўрсатолмайдиган ҳазиллар ва унинг синишини кутганлар ҳақида гапирди.
— Ижтимоий тармоқларда хейтерлари кўп инсонлар бор. Улардан бири актриса Луиза Расулова. Қизиқиб унинг видео ва суратлари остига ёзилган изоҳларни кўриб чиқдим. Ўқиб, уларнинг бари тақводор инсонлар бўлса керак, деб ўйлаб қолдим. Савол туғилади, агар тақвойингиз кучли бўлса, Луиза Расулованинг саҳифасида нима қилиб ўтирибсиз? Ахир тақволи инсон бундай контентдан ўзини чегаралаши керак-ку. “Саҳифасига кириб, уни қарғаб чиқиб кетганингиздан нима маъно бор? Ахир қарғаш тақволи инсоннинг табиатига хос эмас-ку”, дегим келди. Агар изоҳ қолдираётган инсонлар Луизани ёки бошқа бировни ислоҳ қилишмоқчи бўлишса, шахсий хабар йўллаб, мўмин одам каби чиройли қилиб тушунтиришсин. У гапингизга ошиқ бўлиб, юриш-туришини ўзгартирсин. Депутатнинг Instagram саҳифаси ҳам “балчиққа қорилиб ётибди”. Аброр Мухтор Алининг саҳифасида ҳам худди шу аҳвол. Ҳамма хейтер, негатив кайфият устун. Ҳаммани сўкиб устидан мағзава ағдаришаётганини кўриб, ўзи жамиятимизда ҳурмат қилинадиган бирорта одам қолдими, деб ўйлаб қоламан, дейди Даврон Кабулов.
Даврон Кабулов жамоанинг томошаларида нималарга чеклов қўйиши ҳақида ҳам гапириб ўтди.
— Енгил табиатли қизлар ҳаёти билан боғлиқ ҳолатларни аччиқ кулгига олаётган пайтда йигитларга “Эҳтиёт бўлинглар, бу тарғибот бўлиб қолмасин”, деб тайинлайман. Тўғри, айш-ишратга берилган, гиёҳвандларнинг ачинарли ҳаёти ҳақидаги чиқишларимиз бор. Аммо бирортасида моддаларнинг истеъмол жараёнини кўрсатмаймиз. Кўраётган томошабин оқибати қандай бўлишини кулги орқали ҳис қилади, холос дейди Даврон Кабулов.
Даврон Кабулов “Миллион”нинг синишини истаганлар, душманлари ичида экани ва аввалги жамоадошларини аллақачон кечириб юборгани ҳақида гапирди.
— Ҳозир атрофимизда шундай инсонлар борки, улар энг қийин вазиятимизда “душман” томонда эди. Ҳозир эса биз томонда юрибди. Тўғри, улар жамоамда эмас, аммо шу атрофда юрганини биламан. Шукрки, Яратган бизни 6 йил давомида уялтириб, шарманда қилиб қўймади. Ўтган йиллар давомида “Ким аслида ким?” деган саволга томошабин билан бирга икки томон ҳам жавобини олди.
Мен ҳеч бир инсондан хафа эмасман, устимиздан ёзган, ярим йўлда ташлаб кетганларнинг ҳам ҳаммасини кечирдим. Аслида адоватсиз ижод қилиш мароқли. “Миллион”нинг синишини кутганлар кўп бўлди, ҳатто ёнимга келиб “Улар зўр бўлиб кетади”, деганлар ҳам бўлган.
Ишлайман, деган инсонлар билан лойиҳа давом этаверади. Аммо мияси айниган одам иш бермайди ва жамоага нифоқ солишни, ишламасдан пул топишни истайди. Бунақа инсонлар жамоа учун ниҳоятда хатарли, дейди Даврон Кабулов.
