Америкалик миллиардер, Tesla ва SpaceX компаниялари бош директори Илон Маск Х ижтимоий тармоғида (олдинги Twitter) антисемитзм қўллаб-қувватлаётгани боис юзага келган машмашага изоҳ берди. Бизнесмен ўз постида антисемитизм борасидаги барча айбловларни ёлғон деб атади.
“Ўтган ҳафта ОАВда мен антисемит (яҳудийлар душмани) экани ҳақида юзлаб ёлғон материллар пайдо бўлди”, — дейди Маск.
Ижтимоий тармоқ эгасининг қўшимча қилишича, у “инсониятга фақат яхшилик, қолган барчага эса фаровон ва ёрқин келажак тилайди”.
Эслатиб ўтамиз, ўтган ҳафта Маск Х фойдаланувчиларидан бирининг постига жавоб қайтариб, “яҳудий халқи оқ танли инсонларга нисбатан нафратни уйғотмоқда”, деб ёзганди.
Оқ уй Маскнинг баёнотини қоралаган. Apple, Disney, Amazon, Oracle ва бошқа йирик компаниялар миллиардернинг твити сабаб ижтимоий тармоқда реклама беришни тўхтатган эди.
Октябрь охирларида Фаластин маъмурияти Илон Маскнинг SpaceX компанияси билан Starlink сунъий йўлдошлари ёрдамида Ғазо секторида алоқани тиклаш бўйича музокаралар олиб бораётгани маълум бўлганди. Starlink Фаластин билан ҳамкорлик қилишга розилигини билдирган.
