Россия президенти Владимир Путин Жанубий Африка Республикасида бўлиб ўтадиган БРИКС саммитида иштирок этмайди. Бу ҳақда ЖАР президентининг расмий сайтида хабар берилди.
Хабарга кўра, “саммитда Бразилия, Ҳиндистон, Хитой ва Жанубий Африка етакчилари иштирок этади. Ўзаро келишувга кўра, Россия президенти Владимир Путин саммитда қатнашмайди. Аммо Россия томонидан ташқи ишлар вазири Сергей Лавров иштирок этади”, — дейилади баёнотда.
Путин 22—24 август кунлари Йоханнесбургда бўлиб ўтадиган БРИКС саммитига таклиф қилинган эди. Аммо Жанубий Африка Республикаси Путинни ҳибсга олишга ордер берган Гаагадаги Халқаро жиноий суд юрисдикциясини тан олади.
Бу ЖАР расмийлари Путин Республикага келса, уни ҳибсга олиши кераклигини англатади. Аввалроқ ЖАР президенти Сирил Рамафоса россиялик ҳамкасбини ҳибсга ололмаслиги, бу Россияга уруш очишни англатишини таъкидлаганди.
“Россия билан урушга киришиш бизнинг конституциямизга тўғри келмайди. Мен Республиканинг миллий суверенитети, тинчлиги ва хавфсизлигини ҳимоя қилиш, республика аҳолисининг яшаш ва хавфсизлик ҳуқуқларини ҳурмат қилиш, ҳимоя қилиш, илгари суриш ва амалга ошириш бўйича конституциявий мажбуриятларга эгаман”, — деди у.
Ўз навбатида, ЖАР вице-президенти Пол Машатиле БРИКС саммитига Владимир Путин ўрнига ташқи ишлар вазири Сергей Лавров келишини сўраб мурожаат қилганди.
“Биз Рим статути билан боғлиқ эканимизни тушунамиз, лекин кимнидир таклиф қилиб, кейин уни ҳибсга ололмаймиз. Агар у (Путин) келмаса, хурсанд бўлардик”, — дейди Машатила.
ЖАР ҳукумати Россия делегациясининг саммитда иштирок этиши бўйича учта вариант таклиф қилган:
- Россия делегациясига Россия Ташқи ишлар вазирлиги раҳбарлик қилади,
- Путин учрашувда онлайн иштирок этади,
- Учрашувга мезбонлик қилиш Хитойдан сўралади.
Сўнгги маълумотларга кўра, Путин БРИКС саммитида онлайн иштирок этади, Сергей Лавров эса юзма-юз қатнашади.
