Рим папаси Франциск йўғон ичак операциясидан ўтиш учун касалхонага ётқизилди. Бу ҳақда Муқаддас тахт матбуот хизмати раҳбари Маттео Брунига асосланиб, Vatican News хабар берди.
«Бугун куннинг иккинчи ярмида (4 июль) Рим папаси Франциск дивертикуляр йўғон ичак касаллиги бўйича операциядан ўтиш учун Римдаги А. Жемелли клиникасига олиб кетилди», — деди Бруни.
Операция 4 июлга режалаштирилган, деб ёзади Reuters Брунига асосланиб. Муқаддас тахт матбуот хизмати раҳбари жарроҳлик амалиёти натижалари тўғрисида хабар беришни ваъда қилган.
5 июль куни АНСА нашрининг Маттео Бруни баёнотига таяниб хабар беришича, операция яхши ўтди.
«Папа умумий беҳушлик остида қилинган операцияни яхши ўтказди», — деди Бруни. Нашр маълумотларига кўра, папа Франциск касалхонада камида беш кун ётади.
84 ёшли Франциск 2013 йилда папа этиб сайланган. Ўшандан буён биринчи марта касалхонага ётқизилди. Ёшлигида Франциск ўпкасининг бир қисми олиб ташланган. Бундан ташқари, у қуймич асаб яллиғланишидан азият чекади. Ушбу касаллик оқибатидаги кучли оғриқ туфайли папа бу йил байрамона Янги йил ибодатига раҳбарлик қила олмаганди. Мавзуга доир:
