«Пандемия шароитида туризм» лойиҳаси доирасида Туркиянинг Истанбул ва Анталия шаҳарларига ташриф буюрган ўзбекистонлик журналист ҳамда блогерларнинг диққат эътибори шак-шубҳасиз ушбу мамлакатда эмин эркин юрган жониворларга ҳам қаратилди. Туркияда кўча ҳайвонлари ҳақиқатда ҳам кўп. Деярли ҳар қадамда ит ва мушукларни учратишингиз мумкин. Айниқса провинцияларда улар кўпчиликни ташкил этади. Ушбу мамлакатда ит ва мушукларни жуда севиб, алоҳида меҳр билан муносабатда бўлишларини бир қарашдаёқ англаш қийин эмас.
Туркияда ҳеч бўлмаса бир марта бўлганлар билишадики, итларнинг қулоғида чип шаклидаги махсус нишонлар борлигини пайқаш қийин эмас. Бу ит тиббий кўрик, стерилизация ҳамда вакцинациялардан ўтганлигини англатади.
Давлат ит ва мушуклар ҳақида ҳақиқатда ҳам қайғуради, ўтган кетганлар ҳам қўрқмасдан уларни силаши мумкин. Одатда улар шунчаки ўзларига маъқул ҳудудларда айланиб, дарахт ёки бинолар соясида ухлашади. Одамлар яқинига келиб мулойим муносабатда бўлишади. Шаҳарларнинг деярли барча бурчакларида ит ва мушуклар учун озуқа ҳамда сув идишларини учратасиз. Улардаги озуқалар доимий равишда маҳаллий аҳоли ҳамда ҳудудларнинг махсус масъул ташкилотлари томонидан янгилаб борилади. Итлардан фарқли равишда мушукларни бу ерда тиббий текширувдан ўтказиб стерилизация қилишга ҳожат йўқ, деб билишади. Мушуклар иложи борича турли тамаддихоналар яқинида юриб, одамларнинг боқишларини кутишади.
Туркияда, шунингдек, бўшаган пластик идишлар эвазига кўча жониворларини боқувчи махсус аппаратлар ҳам бор. Бу билан ҳукумат «бир ўқ билан икки қуённи уради», яъни ҳам ҳудудлар ифлосланишини камайтиради, ҳам ҳайвонлар оч қолмаслиги таъминланади.
Истироҳат боғлари, жамоатчилик жойларида мушуклар учун махсус уйчалар ҳам мавжуд, уларда асосан мушукларнинг болалари яшайди, аммо катта мушуклар ҳам мазза қилиб вақтичоғлик қилишига гувоҳ бўлиш мумкин.
Туркияда, шунингдек, хўжайинлари томонидан ташлаб кетилган уй ҳайвонлари учун реабилитация марказлари ҳам фаолият юритади. Уларнинг баъзиларида мушук ва итлар классик мусиқалар ёрдамида даволанилади.
Мавзуга доир: Пандемия билан яшаётган Туркия — суратларда
Йўлларда, транспорт воситалари ўтадиган ҳудудларда мана бундай шаклдаги белгилар бўлиб, улар мушукларнинг тўсатдан пайдо бўлиб қолиши мумкинлигидан огоҳлантиради. Бу ҳайдовчиларнинг хушёрлигини оширишга қаратилган. Ушбу ғоя Ялова шаҳри провинцияси маҳаллий ўз-ўзини идора қилиш органлари ҳамда транспорт хизмати назорати идораларининг ташаббуси бўлган.
- «Дарё» фотосаёҳати: «Пандемия шароитида туризм»га мослашган Аё София ва Султон Аҳмад масжидлари
- Фото: Туркиядаги энг катта сарой — Долмабахчега саёҳат
- «Дарё» фотосаёҳати: Туркиянинг Истанбул шаҳридаги Тақсим майдони ва Истиқлол кўчаси манзаралари
- «Дарё» фотосаёҳати: Кемалар, денгиз вокзали, балиқ тутаётган одамлардан иборат Босфор бўғози
