Туркияда коронавирус билан касалланиш бўйича дастлабки ҳолат қайд этилди

Туркияда янги турдаги COVID-19 коронавируси билан касалланиш бўйича дастлабки ҳолат аниқланди. Бу ҳақда мамлакат соғлиқни сақлаш вазири Фаҳриддин Кожага таяниб, Anadolu агентлиги хабар берди.

Вазирнинг сўзларига кўра, касалликка чалинган шахс — Европага борганида коронавирусни юқтириб олган Туркия фуқароси. «Беморнинг умумий аҳволи яхши. Унинг барча оила аъзолари ва у билан мулоқотда бўлганлар назорат остида», — дейди Кожа.

Жаҳон соғлиқни сақлаш ташкилотининг маълумотларига кўра, дунё бўйлаб коронавирус билан касалланганлар сони 113 минг кишидан ошиб кетган. Даволанишга муваффақ бўлганлар 63 578 кишини ташкил этмоқда. Соғлиқни сақлаш вазири Алишер Шодмонов эса Ўзбекистонга коронавирус кириб келмаганини маълум қилди. Мавзуга доир:

• Алишер Шодмонов: «Фейк хабар тарқатганларни жазолаш учун қонуний чора ишлаб чиқилишини қўллаб-қувватлаймиз»
• «Тошшаҳартрансхизмат» АЖ автобусларида махсус санитария тадбирлари ўтказилмоқда

Аввалроқ ижтимоий тармоқларда «Ўртоқлар, бизга — 16-касалхонага иккита коронавирус келди, эҳтиётларингни қилинглар, Тошкентда жуда кўпайиб кетган коронавирус, лекин буни яширишяпти. Икки қават ниқоб тақинглар, кўзларингга кўзойнак тақинглар, чунки коронавирус кўзнинг шиллиқ қаватидан юқади», — деган аудиохабарлар тарқалди. Соғлиқни сақлаш вазирлиги матбуот хизматининг «Дарё»га маълум қилишича, ушбу маълумот ҳақиқатга зид.