Чеченистон республикаси парламенти депутатлари Instagram ижтимоий тармоғини тарк этишга қарор қилди. Бу ҳақда қонун чиқарувчи орган матбуот хизмати хабар берди.
«Депутатлар корпуси Рамзан Қодировнинг саҳифаси блокдан чиқарилмагунича, ўз аккаунтини ёпишини эълон қилган Чеченистон парламенти раиси Магомед Даудовни қўллаб-қувватлайди», — дейилади хабарда.
Эслатиб ўтамиз, 20 декабрь, чоршанба куни АҚШ расмийлари инсон ҳуқуқлари поймол этилишига алоқадор шахслар ўрин оладиган «Магнитский рўйхати»га Чеченистон раҳбари Рамзан Қодировни киритгач, 23 декабрга ўтар кечаси унинг Instagram ижтимоий тармоғидаги саҳифаси ишлашдан тўхтади.
Instagram’даги аккаунти ўчириб ташлангач, Чеченистон раҳбари Рамзан Қодиров бошқа ижтимоий тармоқ — Mylistory’га ўтганини эълон қилди.
