Туркманистонда давлат хизматчилари “ҳукмрон оиланинг сурати тасвирланган газета ва журнал саҳифаларини эҳтиёж қилиш” тўғрисида ёзма мажбуриятнома имзоламоқда. Бу ҳақда шундай ҳужжатларни имзолаган амалдорларга таяниб, Озодлик радиоси хабар берди.
Суратлар туширилган газеталарни ҳожатхона қоғози сифатида ишлатиш, нарсаларни ўраш ёки олов ёқиш учун қўллаш каби ҳолатлар кузатилган. Туркманистонда давлат хизматчилари ва талабалар одатда давлат нашрларига обуна бўлишга мажбур. Аммо энди улар янги талабларга дуч келмоқда. Бу газеталарни уйда (бутунлигича ёки улардан қирқиб олинган ҳолда) сақлаш, ифлос қилмаслик ва улардан бошқа мақсадларда фойдаланмасликдан иборат.
Ғарбий Болқон вилоятидаги бир давлат хизматчисига кўра, унинг шаҳридаги давлат ходимларига Янги йилдан бошлаб давлат газеталарини “ифлосламаслик” тўғрисида кўрсатма берилган.
Мувофиқликни назорат қилиш учун ҳокимият органлари газеталарнинг ҳар бир саҳифасига QR кодларини чоп этиши мумкин. Болқондаги яна бир давлат хизматчиси таъкидлашича, бу уларга чиқиндига ташланган саҳифаларни ким ташлаганини кузатиш имконини беради.
“Энди уйда болаларнинг газеталарга ҳам тегишидан қўрқамиз. Агар кичкина бола президент суратини йиртиб ёки бузиб, кўчада бирор жойга ташлаб юборса, иш жойимизни йўқотиш хавфи туғилади”, дейди аноним амалдор.
Таъкидланишича, кўпчилик давлат хизматчилари мажбурий обуна бўлган газеталарни ўқимайди, аксинча уларни уйда ёки ишда бошқа мақсадларда фойдаланди. Намгарчиликда эски пойабзалларни қоплаш учун газеталардан фойдаланиш кенг тарқалган. Аҳолининг харид қобилияти пастлигини ҳисобга олган ҳолда, ҳожатхоналарда ҳам газеталардан фойдаланиш ҳолатлари кузатилган.
Изоҳ (0)