Қозоғистон қўшимча вакциналар ва дори-дармонлар харид қилиш мақсадида болаларни хавфли касалликларга қарши эмлаш учун 13 миллион доллар маблағ ажратди. Бу ҳақда Қозоғистон Республикаси ҳукумати хабар берди.
Миллий эмлаш тақвими доирасида эмлашни ўтказиб юборган 18 ёшгача бўлган болаларни эмлаш учун давлат захирасидан 13 миллион доллар ажратилган. Мамлакатда 800 мингдан ортиқ эмланмаган болалар аниқланган.
Эмлаш дастури кўк йўтал, дифтерия, А ва Б вирусли гепатити, қизамиқ, қизилча, қоқшол, полиомиэлит, паротит ва пфайфер таёқчаси каби касалликларни қамраб олади.
Ушбу маблағ Қозоғистоннинг турли вилоятларига 747 720 доза вакцина ва 542 592 шприц сотиб олиш учун юборилади.
Қозоғистон Соғлиқни сақлаш вазирлиги таъкидлаганидек, мамлакатда сўнгги икки ойда эмлаш туфайли қизамиқ билан касалланганлар сони 32 фоизга камайган. 1,3 миллионга яқин одам, яъни мақсадли аҳолининг 91 фоизи эмланган.
Бироқ, бошқа олдини олиш мумкин бўлган касалликлар кўпаймоқда. Мисол учун, 2023 йилда кўк йўтал билан касалланганлар сони ортиб, 91% ҳолатлар эмланмаган болаларда учраган. Қизилча, паротит ва вирусли гепатит А билан касалланганлар сони ҳам ошган, — дейилади хабарда.
Изоҳ (0)