Ўзбекистонда давлат пенсияларининг барча турлари учун ойига 4,5 триллион сўм тўланмоқда. Бу ҳақда Пенсия жамғармаси “Дарё”га маълум қилди.
Жамғарма ахборотига кўра, бугунги кунда давлат пенсияларининг барча турлари учун йиллик 53,5 триллион сўм тўланмоқда. Бунда бир ойлик ўртача харажатлар миқдори қарийб 4,5 триллион сўмни ташкил этади.
“Пенсия жамғармаси томонидан жорий йил 1 июлгача 4,5 миллион нафар давлат пенсияси олувчиларга 28,8 триллион сўм молиялаштириб берилди”, — дейилади ташкилот маълумотида.
1 июль ҳолатига республикада энг юқори иш ҳақи билан пенсия (ҳисобланган) тайинланган фуқаролар 401,9 минг нафарни ва энг кам миқдорда пенсия олувчилар 652,9 минг нафарни ташкил этган.
Жорий йилнинг январь июнь ойларида янги тайинланган пенсиялар ва нафақалар:
- ёшга доир пенсия олувчилар – 121 минг 620 нафарни;
- ногиронлик пенсиясини олувчилар – 15 минг 326 нафарни;
- боқувчисини йўқотганлик пенсиясини олувчилар – 9 минг 255 нафар оилани;
- нафақалар – 55 минг 15 тани ташкил этди.
Ҳозирда мамлакатда энг кам миқдордаги пенсиялар қуйидагича:
- Ёшга доир энг кам пенсия – 677 000 сўм;
- Ногиронлик пенсиялари, жумладан, иш стажи тўлиқ бўлмаган чоғдаги ногиронлик пенсиясининг энг кам миқдори – 747 000 сўм;
- Меҳнатга лаёқатсиз фуқароларга бериладиган ногиронлик нафақаси ва болаликдан ногиронлиги бўлган шахсларга бериладиган нафақа миқдори – 747 000 сўм;
- Белгиланган ёшга доир энг кам пенсия миқдоридан (677 000 сўмдан) 747 000 сўмгача пенсия олувчиларнинг ёшга доир пенсиялари – 747 000 сўм.
Бугунги кунда зарур иш стажига эга бўлмаган кекса ёшдаги фуқароларга ойига 568 000 сўмдан нафақа берилади. Иш стажи тўлиқ бўлмаган чоғдаги ёшга доир пенсиянинг энг кам миқдори (қўшимча тўловни ҳисобга олганда) – 568 000 сўм.
Шунингдек, ўзгалар парваришига муҳтож ногиронлиги бўлган 18 ёшгача болаларнинг парвариши билан банд бўлган боланинг қонуний вакилига бериладиган нафақа миқдори — ойига 568 000 сўмни ташкил этади.
Изоҳ (0)