Тасаввур қилинг, Локи Тор ролини, Юлдузли Лорд эса Капитан Америка ролини ўйнаса. Келинг, параллел Marvel кино олами қандай бўлишини кўриб чиқамиз.

Кичик Роберт Дауни

Дарҳақиқат, студиянинг замонавий тарихи айнан шу шахсдан бошланган. Комикслар асосидаги фильмлар 2008 йилгача суратга олинган, бироқ улар “Темир одам” каби машҳур бўлмаган. Агар Жон Фавро кичик Даунига ишонмаганида эди, суперқаҳрамонлар киноси даври анча кеч келган бўлиши мумкин эди.

Ўша пайтда режиссёрда жуда кўп машҳур актёрлар рўйхати бор эди — дастлаб Леонардо Ди Каприо, Сем Роквелл ва Том Круз кўриб чиқилади, кейинчалик рол Хью Жекманга таклиф қилинади, “Арвоҳ пойгачи” номи билан танилган комикслар мухлиси Николас Кейж ҳам рўйхатга киритилганди. Бироқ бу ролга Marvel’нинг бошқа фильми учун кастингдан ўтган Роберт танланади — у “Фантастик тўртлик”да Доктор Дум ролини ўйнамоқчи бўлган.

Крис Пратт

Актёр дастлаб Капитан Америка ёки Тор ролини ўйнашни хоҳлаган. Пратт янги Marvel лойиҳаси бошланиши ҳақида билиши биланоқ, кастингга тайёрланарди. Аммо унга мос қаҳрамон йўқ эди.

Крис DC лойиҳасига ҳам олинмаган. Актёр суперқаҳрамон бўлишдан умидини узган пайтда “Галактика қўриқчилари”га лидер керак бўлиб қолади. 2014 йилда Жеймс Ганн Праттни Юлдузли Лордга айлантиради.

Жейк Жилленхол

Жейк Жилленхол Доктор Стренж ролини ўйнамоқчи эди, аммо мағрур суперқаҳрамон жарроҳ роли Бенедикт Камбербетчга насиб этади. Дастлаб британиялик актёр лойиҳада иштирок этишдан бош тортади, аммо қаҳрамоннинг тарихини ўргангач, рози бўлади. Агар у фикрини ўзгартирмаганда Жилленхол лойиҳада ўз ўрнига эга бўлмасди — студияда жуда кучли захира рўйхати бор эди — Киану Ривз, Виго Мортенсен, Райан Гослинг, Жаред Лето, Хоакин Феникс, Том Харди ва Колин Фаррелл қисқа рўйхатга киритилганди.

Бир неча йил ўтгач, Мистерио образидаги Жейк “Ўргимчак одам: Уйдан узоқда” фильмининг бош қаҳрамонига айланади.

Анжелина Жоли

Энг чиройли Marvel кастинги, эҳтимол, 2009 йилда — “Темир одам” фильмининг иккинчи қисмини суратга олиш бошланишидан олдин бўлиб ўтгандир. Айнан ўша ерда Наташа Романофф пайдо бўлади. Тони Старкнинг қуролдоши бўлган суперқаҳрамон кейинчалик кино оламининг асосий қаҳрамонларидан бирига айланади ва 9 та фильмда иштирок этади. Скарлетт Йоханссон ҳаммасида ўйнайди, аммо унинг ўрнида Анжелина Жоли бўлиши мумкин эди.

Marvel’га қўшилиш учун актриса 10 йилдан ортиқ кутди. Аммо у бундай қурбонликларга тайёр эди:

“Мен актрисалик нуқтаи назаридан жуда хилма-хил оиланинг бир қисми бўлишни хоҳлардим. Ролимнинг қанчалик катта бўлиши мен учун муҳим эмасди”.

2021 йилда “Умрбоқийлар” фильми экранларга чиқди, унда актриса умрбоқийлар етакчиси Тена ролини ижро этди.

Том Хиддлстон

Локи — Marvel мухлисларининг севимли антагонистларидан бири. Ким билади, агар Том Хиддлстоннинг ўрнида бошқа биров бўлганида, ёлғон худоси мафтункор бўлиб чиққан бўлармиди? Британиялик актёр дастлаб Тор роли учун имтиҳондан ўтади. Аммо режиссёр Кеннет Брана тезда момақалдироқни Крис Хемсвортга топшириш кераклигини тушунади.

Айтганча, кичик Хемсворт ҳам мазкур фильмда ўйнаши мумкин эди — Лиам ҳам кастингларда қатнашган. Бундан ташқари, Крис укасининг маслаҳатига таяниб, синов дублларини ўйнаганини тан олади.