Жиззахда бандлик бош бошқармаси масъул ходими пора билан қўлга тушди

Жиззах шаҳрида вилоят бандлик бош бошқармаси масъул ходими пора билан қўлга тушди.

Хабарга кўра, вилоят ички ишлар бошқармасига Жиззах шаҳрида яшовчи фуқаро ариза билан мурожаат қилиб, касб-ҳунарга ўқитганлик тўғрисидаги сертификат тайёрлаб бериш эвазига пора талаб қилинаётганини маълум қилган. Вилоят бандлик бош бошқармасида масъул лавозимда ишлаб келган Ш.Ш. касбга ўқитиш бўйича сертификат тайёрлаб бериш эвазига (ИИБга ариза билан мурожаат қилган) фуқародан хизматлари эвазига 400 доллар беришини талаб қилган. 

Вилоят ИИБ мутасадди ходимлари билан келишилган ҳолда тезкор тадбир ўтказилиб, Ш.Ш. Мирзачўл тумани касб-ҳунар марказига тегишли мутахассислик сертификатини сохталаштирган ҳолда 400 долларга сотмоқчи бўлиб, олдиндан бир миллион 100 минг сўмини – 100 доллар ҳисобида олаётган вақтида далилий ашёлар билан қўлга олинди.

Ушбу ҳолат юзасидан жиноят иши қўзғатилиб, дастлабки тергов ҳаракатлари олиб борилмоқда.