Меваларга бой рацион ва тизимли овқатланиш: Мелания Трампнинг фастфудни яхши кўришига қарамай, сарвқомат экани сабаби нимада?

АҚШнинг собиқ биринчи хоними Мелания Трампнинг жозибали ва ўзига хос кўринишига кўпчилик ҳавас қилади. Сарвқоматлигининг сири унинг тўғри овқатланишга амал қилиши, баъзида эса кўнгли тусаган егуликларни ўзига раво кўриши билан боғлиқ.

Мелания бургерлар, Нью-Йоркнинг Jean Georges ресторанидаги қовурилган товуқлар ва шакарсиз колани яхши кўради ва онда-сонда ўзига раво кўриб туради. Бошқа пайтларда эса ўзига нисбатан талабчан муносабатда бўлади ва анча вақтдан буён амал қилиб келадиган бир нечта қоидаларга риоя қилишни канда қилмайди. 52 яшар Мелания тўғри овқатланишга ўзгача муносабатда бўлади.

«Соғлом маҳсулотларни уларни истеъмол қилгандан кейин ўзимни энергияга тўла ва саломат ҳис қилганим учун ҳам яхши кўраман. Шундай экан улардан воз кечишга не ҳожат», — деган у.

Кундалик рациони ҳақида гап кетганда, Мелания берган интервьюларидан бирида нонуштага клетчаткага бой сули ёрмаси ҳамда витамин ҳамда антиоксидантлар кони бўлган смузи ейишни афзал билишини, эрталаб фойдали ва энергияга тўла нонушта қилгани учун ҳам кун бўйи очликни ҳис қилмаслигини таъкидлаган.

Тушликка бўлса балиқ, денгиз маҳсулотлари ва сабзавотларни истеъмол қилади. Кечки овқат учун эса клетчатка миқдори юқори бўлган салатлар тановул қилишни маъқул билади. Қолаверса, Трамп хоним моделлик карьерасининг бошида кунига уч литрга яқин сув ичган.

У кўп йиллардан буён спортнинг теннис, сузиш ва ёга турлари билан шуғулланади. Айнан шу сабаб ҳам фарзанди Беррон дунёга келганидан кейин қоматини тиклаш осон бўлган. Ялпиз, лимон, сув ва буғдойдан тайёрланган коктейл — севимли ичимликлари. Улар метаболизмни яхшилаш билан бирга, қоматининг тонусда бўлишига ёрдам беради.

Бундан ташқари, рациони ҳамиша меваларга бой эканига қарамай, у қора шоколад ва музқаймоқ ҳам истеъмол қилиб туради. «Рационингиз асосини фойдали маҳсулотлар ташкил қилса, вақти-вақти билан ширинлик ва зарарли маҳсулотлар еб туришнинг ёмон тарафи йўқ», — дейди у.