Республика «Ижтимоий фикр» жамоатчилик фикрини ўрганиш маркази 24 октябрь куни бўлиб ўтадиган президент сайловлари бўйича телефон орқали сўровнинг тўртинчи босқичи натижаларини эълон қилди. Сўров 30 августдан 10 сентябргача ўтказилган бўлиб, унда республиканинг барча ҳудудлари аҳолиси қатнашган.
Телефон сўровлари натижалари мониторингининг кўрсатишича, Президент сайлови фуқароларнинг мамлакат ижтимоий-сиёсий ҳаётига интеграциялашуви даражасини оширишга хизмат қилади.
«Сиз мамлакатнинг ижтимоий-сиёсий ва ижтимоий-иқтисодий ҳаётини кузатиб борасизми?» деган саволга аксарият фуқаролар ижобий жавоб берган, шулардан 47,9 фоиз респондентлар мамлакатда кечаётган ижтимоий-сиёсий жараёнлар билан доимий равишда, 40,2 фоизи сўралганлар эса вақти-вақти билан қизиқишини маълум қилган.
Тадқиқотни ўтказиш вақтида 91,8 фоиз ўзбекистонликлар Президент сайловлари бўлиб ўтишидан хабардор бўлган. Сўров натижаларининг таҳлили сайловолди кампаниясининг боришини сўралганларнинг ярмидан сал кўпроғи — 60,5 фоиз кузатиб боришларини кўрсатган.
Сўровлар давомида аниқланишича, 71,2 фоиз респондентлар учун сайловолди кампаниясининг бориши ва бўлажак сайловда овоз беришга тайёргарлик ҳақидаги ахборотнинг энг оммабоп манбаси Ўзбекистон давлат телевидениеси ҳисобланади. Ушбу рейтингда интернет иккинчи ўринни эгаллаган, 46,5 фоиз сўров иштирокчилари бўлажак сайлов янгиликлари билан интернет орқали танишган. 32,8 фоиз респондентлар учун сайловолди кампаниясининг бориши ҳақидаги асосий ахборот манбаси мамлакат нодавлат телевидениеси каналлари ҳисобланади.
Сўров натижалари таҳлилининг кўрсатишича, жамоатчилик фикрида сайловолди жараёнининг бевосита иштирокчилари ўртасидаги очиқ телемунозаралар президентликка номзодларнинг сиёсий дастурлари ҳақида маълумот олишнинг энг жозибали шакли ҳисобланади. Ушбу фикрга телефон сўровининг 46,5 фоиз иштирокчилари қўшилган 21,7 фоиз респондентлар номзодларнинг ишончли вакиллари иштирокидаги ток-шоуларга қизиқиш билдирган. Сўров иштирокчилари уларга мустақил экспертлар, олимлар, таҳлилчиларнинг бўлажак сиёсий воқеа ҳамда номзодлар ва уларнинг сиёсий устуворликлари ҳақидаги фикрлари, шунингдек, номзодларнинг сайловчилар билан бевосита учрашувлари қизиқарли эканини таъкидлаган.
Шу билан бирга, сўров иштирокчилари тадқиқот давомида номзодларнинг сайловолди дастурлари билан тўлиқ танишишга ҳали улгурмагани, уларнинг дастурий мақсад ва вазифалари ҳақида фақат умумий тасаввурга эга эканини таъкидлаган.
Қайд этилишича, телефон сўрови аҳолининг юқори электорал фаоллигини аниқлаган, сайлаш ҳуқуқига эга бўлган кўпчилик ўзбекистонликлар, ўзларининг шахсан таъкидлашларича, Ўзбекистон президентлигига бўлажак сайловда, албатта, иштирок этади.
Эслатиб ўтамиз, «Ижтимоий фикр»нинг 2016 йилги сўровида қатнашганларнинг 97,5 фоизи Президент сайловида иштирок этишини маълум қилганди.
Изоҳ (0)