«Мароқанд нефть базаси» МЧЖ ва унинг филиалларида коррупция ва талон-торожга қарши профилактик тадбир ўтказилди. Ўрганиш давомида жамиятнинг масъул мансабдор шахслари томонидан юклатилган вазифалар лозим даражада бажарилмагани, молиявий қонунчиликка риоя этилмаслиги ҳамда ташкилотнинг молиявий ҳолатига бефарқлиги оқибатида жиддий молиявий хато ва камчиликларга йўл қўйилгани аниқланди.
Жумладан, нефть базаси ва унинг филиалларига «Бухоро нефтни қайта ишлаш заводи» томонидан вақтинчалик масъул сақлашга топширилган жами 23 миллиард 339 миллион сўмлик 3219 тонна автобензин белгиланган тартибда биржа савдолари орқали сотиб олинмасдан, истеъмолчиларга юклаб жўнатиб юборилган.
Бунинг оқибатида юзага келган нарх тафовутлари орқали нефть базасига жами 2 миллиард 666 миллион сўмлик зарар етказилган. Шунингдек, товар-моддий қийматликлар, асосий воситалар ва нефть маҳсулотларидан жами 844,5 миллион сўм миқдорида камомадлар аниқланди.
Таъкидлаш жоизки, айрим масъуллар томонидан нефть маҳсулотларининг ҳисобини юритиш учун мўлжалланган ёқилғи сиғимларининг калибровка жадваллари атайин ўзгартирилиб, камомадлар яшириб келинган.
Жумладан, Булунғур филиалининг масъуллари томонидан 2020 йил 15 августдан 2021 йил 31 июлгача бўлган даврдаги 2000 куб метр сиғимда сақланиб келаётган Аи-80 К2-Л автобензин маҳсулоти ўлчаш жараёнларида маҳсулотнинг маълум баландлиги (см) бўйича ҳажм (литр) қолдиқлари нотўғри кўрсатилиб келингани оқибатида ҳисобот даври якунларига кўра ўтказиб келинган хатловлар хатолик билан ўтказилган, оқибатда 145 785 литрдан 750 918 литргача номутаносибликлар хатловларда яшириб келинган.
Нефть маҳсулотларининг сақланиши бўйича ўтказилган ўрганишларда нефть базанинг Булунғур филиалида олиб борилган хатловлар натижасида 308,6 миллион сўмлик 41 296 литр Аи-80 К2-Л автобензини ортиқча экани аниқланган.
Бундан ташқари, нефть маҳсулотларини асоссиз равишда ҳисобдан чиқариш ва иш ҳақидан бўлган қарздорликлар бўйича жами 453,4 миллион сўм миқдорида молиявий хато-камчиликлар аниқланган.
Жамият филиаллари автохўжалигининг механиклари ва ҳайдовчилари томонидан жами 148,6 миллион сўмлик 24 223 литр нефть маҳсулотлари асоссиз равишда ҳисобдан чиқарилган. Масалан, жамият автохўжалиги механиги ва ҳайдовчилари ўртасидаги келишув натижасида аслида газ ёқилғиси билан ҳаракатланишда бўлган юк автомашинасига ҳақиқатда бажарилмаган қатновлар бўйича йўл варақалари расмийлаштирилиб, жами 18 933 литр 117,1 миллион сўмлик бензин ёқилғиси маҳсулоти ноқонуний ҳисобдан чиқарилган.
Жамият ва унинг филиалларининг қарзи 2021 йилнинг 1 сентябрь ҳолатига кўра 33 миллиард 384 миллион сўм бўлиб, шундан муддати ўтиб кетган дебиторлик қарздорлиги 19 миллиард 843 миллион сўмни ҳамда бугунги кунда ундириш «умидсиз» (корхоналар ёпилиши, даъво муддатларининг ўтиши ва ҳоказо) бўлган қарздорлик суммаси 14 миллиард 234 миллион сўмни ташкил этмоқда.
Аниқланган ҳолатларга ҳуқуқий баҳо бериш мақсадида маълумотлар ҳуқуқни муҳофаза қилувчи идораларга тақдим этилган.
Ўтказилган ўрганишлар аниқланган хато-камчиликларни бартараф этиш, уларнинг келгусида йўл қўйилишининг олдини олиш мақсадида «Ўзбекнефтгаз» АЖнинг тегишли департаментлари ва нефть база жамоаси иштирокида «Мароқанд нефть базаси» МЧЖда кенгайтирилган йиғилиш ўтказилди.
Йиғилиш давомида камчиликларга йўл қўйган «Мароқанд нефть базаси» МЧЖнинг жами 11 нафар масъул мансабдор шахси билан тузилган меҳнат шартномалари бекор қилинди, 6 нафар ходимга нисбатан интизомий жазо чоралари қўлланилди.
Изоҳ (0)