Вазирлар Маҳкамасининг «Ўзбекистон Республикаси ҳукуматининг айрим қарорларига чет давлат фуқаролари ва фуқаролиги бўлмаган шахсларнинг Ўзбекистон Республикасида бўлиш тартибини такомиллаштиришга қаратилган ўзгартиришлар киритиш тўғрида»ги қарори қабул қилинди.
Ҳужжат билан Вазирлар Маҳкамасининг 1996 йил 21 ноябрдаги 408-сон қарорига ўзгартириш киритилган. Хусусан, ушбу қарорда карантин жорий этилган ҳудудда вақтинча бўлиш муддати тугаган хорижий фуқароларга, шунингдек, уларни қабул қилган уй-жой эгалари ҳамда мансабдор шахсларга нисбатан карантин муддати тугагунга қадар Ўзбекистонда бўлиш қоидаларини бузганлиги учун маъмурий чоралар қўлланилмаслиги белгиланганди.
Ҳукуматнинг янги қарорига асосан мазкур банд бекор қилиниб, чет эл фуқаролари ва фуқаролиги бўлмаган шахслар 10 сентябрдан республикада бўлиш тартибини бузгани учун Ўзбекистон ҳудудидан чиқариб юборилади.
Ҳужжатга мувофиқ, республика ҳудудидаги чет эл фуқаролари ва фуқаролиги бўлмаган шахслар 2021 йил 10 сентябргача вақтинчалик рўйхатдан ўтишлари керак бўлади.
Қарорнинг бажарилиши ички ишлар вазири Пўлат Бобожонов зиммасига юклатилган.
Аввалроқ Россияда 30 сентябргача мақомини қонунийлаштирмаган мигрантлар мамлакатдан чиқариб юборилиши маълум қилинганди.
Изоҳ (0)