19 февраль кунидан бошлаб коронавирус сабаб икки ҳафтадан буён Япониянинг Йокогама портида карантинда турган Diamond Princess саёҳат кемасининг йўловчилари қирғоққа чиқа бошлади. Бугуннинг ўзида 500 киши кемани тарк этиши кутилмоқда, деб хабар беради NHK.

Фото: Reuters

Йўловчиларни кемадан тушириш жараёни 21 февралга қадар давом этиши кутилмоқда.

Маълумотларга кўра, кемани маҳаллий вақт билан соат 10:30 да 70-80 ёшдаги қариялар тарк эта бошлаган. Коронавирус аниқланган бошқа йўловчилар қўшимча карантин даври тугагунига қадар кема бортида қолишга мажбур.

Diamond Princess саёҳат кемаси жорий йилнинг 20 январь куни Йокогамадан чиқиб, Кагосима—Гонконг—Окинава йўналишидан ўтиб, 3 февраль куни қайтиб келган. Бу вақтга келиб кемадаги бир неча киши тоби қочгани ҳақида хабар қилган ва ҳукумат бортдаги барчани текширувдан ўтказишга қарор қилган. 11 февраль куни саёҳат кемасидаги кексалар ва сурункали касалликларга эга беморларни соҳилга эвакуация қилиш бошланган эди.