АҚШнинг электромобиллар ишлаб чиқарувчи Tesla компаниясининг бозор қиймати илк бор муайян вақт давомида 100 миллиард доллардан қимматроқ бўлиб турди. Бу ҳақда Reuters хабар қилган.
21 январдаги биржа савдоларида Tesla’нинг битта акцияси нархи 555,1 долларгача кўтарилди, компания умумий капитали эса 110,1 миллиард долларга етди. 22 январдаги савдоларда битта акция нархи 547,2 долларгача тушди, умумий капитал эса 98,6 миллиардга тенг бўлди.
Bloomberg’нинг ёзишича, Tesla акциялари компаниянинг 2019 йил учинчи чорагида Хитойда завод очиши натижасида эришган муваффақиятлари сабаб қимматлашган. Reuters’нинг қайд этишича, Tesla компаниясининг қиймати Ford ва General Motors автоконцернлари капитали бирлаштирилса ҳам улардан қимматроқ бўлади.
Агар Tesla асосчиси Илон Маск компания капиталини яна 100 миллиард долларга етказа олса ва ушбу қийматни ярим йил давомида ушлаб турса, унга 346 миллион доллар миқдорида мукофот пули берилади, деб ёзган Bloomberg ҳамда Reuters.22 январдаги биржа савдолари давомида Tesla акциялари яна ошиб, компания капиталининг миқдори 100 миллиард доллардан кўпайди.
2018 йил баҳорида Илон Маск Tesla’даги маошининг ошкора ҳисоблаб борилишидан воз кечган. Шундан бери унинг мукофот пуллари компаниянинг молиявий натижаларига боғлиқ ҳолда белгиланади ва тўланади.
2018 йил август ойида Маск Twitter’даги аккаунтида ҳазиллашиб Tesla акцияларини 420 доллардан харид қилишга тайёрлигини билдирган (ўшанда компания қимматли қоғозларининг нархи 350 доллардан ҳисобланарди). Қимматли қоғозлар ва биржалар бўйича АҚШ комиссияси Маск ўша твити билан бозор иштирокчиларини чалғитишга урингани учун унга нисбатан 20 миллион доллар жарима жазоси тайинлаган, ушбу ҳаракат туфайли Илон Tesla директорлар кенгаши раҳбари лавозимидан кетганди. Ҳозирда Маск компанияни бош директор сифатида бошқариб келмоқда.Охирги саккиз ой ичида Tesla’нинг акциялари уч бараварга қимматлашди. 2020 йил 13 январда қимматли қоғозларнинг бир донасининг нархи илк бор 500 долларга чиқди.
Изоҳ (0)