Ўзининг сўконғичлиги билан машҳур бўлган ва 2018 йилнинг апрелида бош вазир томонидан охирги марта огоҳлантирилган Андижон шаҳар ҳокими Дилмурод Раҳматуллаев ишдан олинади. Бу ҳақда эртага, 26 август куни ўтазиладиган халқ депутатлари Андижон шаҳар Кенгашининг навбатдан ташқари сессиясида маълум қилинади, дея хабар бермоқда «Дарё» манбаси вилоят ҳокимлиги вакилларига таяниб.
Вилоят ҳокимлигининг исми сир қолишини сўраган манбанинг маълум қилишича, Андижон вилояти ҳокими Шуҳрат Абдураҳмонов иштирок этиши кутилаётган навбатдан ташқари сессия Андижон шаҳридаги Ёшлар марказида ўтказилиши мўлжалланмоқда. Сессияда ташкилий масала кўриб чиқилиб, Раҳматуллаев лавозимидан озод этилгани маълум қилинади ва шаҳарнинг янги ҳокими таништирилади.
Маълумот учун, Дилмурод Раҳматуллаев таълим тизимида турли лавозимларда ишлаган. Бир муддат вилоят халқ таълими бошқармасини бошқарган. 2016 йилдан буён Андижон шаҳрига ҳокимлик қилиб келаётганди.
У 2017 йилнинг кузида Андижон шаҳридаги қатор таълим муассасаларининг раҳбарларини ножўя сўзлар билан ҳақорат қилгани тасвирланган аудиоёзувлар тарқалиб кетганидан сўнг интернетда машҳур бўлганди ва ўша йилнинг декабрь ойида суд ҳукми билан энг кам иш ҳақининг 30 баробари миқдорида жаримага тортилганди.
Шундан сўнг у 2018 йилнинг апрелида ўтказилган видеоселекторда шаҳар кўчаларини ободонлаштириш учун бюджет ташкилоти ходимлари, жумладан, мактабгача таълим муассасалари ходимларини тадбиркорлардан гул ва дарахт кўчатларини анча қиммат нархга сотиб олишга мажбурлагани учун бош вазир томонидан ҳайфсан олган ҳамда охирги маротаба огоҳлантирилган эди.
Шаҳар ҳокимлигида ишловчи манбаларнинг айтишича, ҳоким шанба куни хонасидаги ўзига тегишли бўлган барча нарсаларни йиғиштириб олиб чиқиб кетган.
Изоҳ (0)