Тошкент шаҳар Ички ишлар Бош бошқармаси Жиноят қидирув бўлими томонидан тақдим этилган маълумотларга кўра, Интернет-ресурслар орқали амалга оширилаётган фирибгарлик ҳолатлари кўпаймоқда, деб ёзади ЎзА. Бош бошқарма сайтида берилган хабарда бунга фуқароларнинг ўта ишонувчанлиги сабаб бўлаётгани қайд этилган.
Хабарда Украина фуқаролари томонидан olx.uz’да амалга оширилган фирибгарлик ҳолати (исмлар ўзгартирилган тарзда) мисол қилиб келтирилди:
«Жорий йилнинг 13 июнида Николай Тарасов Тошкент шаҳар ИИББга мурожаат қилди. Унинг сўзларига кўра, olx.uz сайтида Epica русумли автомобилни сотиш бўйича рекламани кўрган. Эълон муаллифи ўзини Украина фуқароси сифатида таништиради. У автомобиль Ўзбекистонда рўйхатдан ўтганини ва агар Н. Тарасов ўзининг тўлов қобилиятини тасдиқласа, у Ўзбекистонга машинани олиб бориб беришини маълум қилган. Бунинг учун Николай халқаро пул ўтказмалари тизими орқали ўз номига 4000 АҚШ доллари миқдорида пул жўнатиб, Telegram орқали трансфер маълумотларини кўрсатиши керак эди. Н. Тарасов бу шартларнинг барчасини бажарганидан сўнг, фирибгар Тарасовнинг шахсий гувоҳномасининг қалбаки нусхасини тайёрлаб, пулни ечиб олади ва у билан ёзишмаларини тўхтатади».
Бошқарма хабарида яна бир мисол келтирилган ва фуқаролардан бегоналарга тўлов тизимлари орқали пул ўтказишда ва онлайн-дўконларда харид қилишда эҳтиёт бўлиш сўралган. Интернетда номаълум шахс томонидан тақдим этилган шартларга розилик беришдан олдин, банк муассасаларининг мутахассислари билан маслаҳатлашиш тавсия этилган.
Изоҳ (0)