Санкт-Петербург метросидаги портлашни амалга оширган террорчилар «электрон излар» орқали топилган
2017 йилда Санкт-Петербург метросида юз берган терактни ҳаттоки ўзаро таниш бўлмаган ва фақат замонавий алоқа воситалари орқали мулоқот қилган экстремистик ташкилот иштирокчилари амалга оширган. Бу ҳақда Россия Тергов қўмитаси расмий вакили Светлана Петренко маълум қилди, деб ёзади «РИА Новости».
Унинг сўзларига кўра, бундай алоқа усулларидан фойдаланилганда қоладиган «электрон излар»нинг синчиклаб таҳлил қилиниши натижасида қисқа муддатда жиноий гуруҳ аъзоларининг барчаси фош қилинган ва шахси аниқланган.
Петренконинг қўшимча қилишича, жиноий иш бўйича айбланувчи сифатида 11 киши жалб қилинган, уларнинг барчаси ҳибсда сақланмоқда.
2017 йил 3 апрель куни Санкт-Петербург метрополитени вагонида рўй берган портлаш оқибатида 16 киши, шу жумладан, худкуш террорчи — қирғизистонлик Акбаржон Жалилов ҳалок бўлди. 50 киши жароҳат олди.
