Тошкентда Telegram’да «Матлуба» тахаллуси билан жиҳодга ундовчи аудио ва видеофайллар тарқатган аёл қўлга олинди. Бу ҳақда «Telegraf.uz» хабар бермоқда.
Хабар беришларича, 7 сентябрь куни «Матлуба» билан Шайхонтоҳур туманида фаолият юритувчи якка тартибдаги тадбиркор алоқага чиққан. У тадбиркор йигитга Қуръон тиловатлари, бошқа диний сурат ва видеороликлар, саловат қўшиқлари, турли мазмундаги шеър ва маърузаларни ўтказиб берган.
«Telegraf.uz»нинг ёзишича, Вазирлар Маҳкамаси ҳузуридаги Дин ишлари бўйича қўмитага тадқиқ учун Samsung Galaxy Ace 3 уяли алоқа воситаси тақдим этилган; қўмитанинг 19 сентябрдаги хулосасига кўра, уяли алоқа воситаси хотирасида тақиқланган «Тавҳид в жиҳод» катибасининг жиҳодга ундовчи аудио ва видеофайллар бўлган.
Русуми келтирилган уяли алоқа воситаси айнан кимга тегишли эканига «Telegraf.uz» хабарида аниқлик киритилмаган. Айни вақтда, бундай материалларни Ўзбекистон ҳудудига олиб кириш, тайёрлаш ва тарқатиш тақиқлангани сабаб, гумонланувчи Шайхонтоҳур туман ИИБга келтирилган.
Қайд этишларича, ушбу ҳолат бўйича Жиноят кодексининг 244-1-моддаси 2-қисми билан жиноят иши қўзғатилган, тергов ишлари олиб борилмоқда.
Мазкур моддага кўра — «диний экстремизм, сепаратизм ва ақидапарастлик ғоялари билан йўғрилган, қирғин солишга ёки фуқароларни зўрлик билан кўчириб юборишга даъват этадиган ёхуд аҳоли орасида ваҳима чиқаришга қаратилган маълумотлар ва материалларни ҳар қандай шаклда тарқатиш, худди шунингдек фуқаролар тотувлигини бузиш, туҳматона, вазиятни беқарорлаштирувчи уйдирмалар тарқатиш ҳамда жамиятда қарор топган хулқ-атвор қоидаларига ва жамоат хавфсизлигига қарши қаратилган бошқа қилмишларни содир этиш мақсадида диндан фойдаланиш, шунингдек диний-экстремистик, террорчилик ташкилотларининг атрибутларини ёки рамзий белгиларини тарқатиш ёхуд намойиш этиш» — энг кам иш ҳақининг 300 бараваридан 400 бараваригача миқдорда жарима ёки уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланади.
Изоҳ (0)