Крис Эванс кетма-кет иккинчи йил энг кўп даромад келтирган актёр деб топилди

Forbes журнали Голливуд актёри Крис Эвансни 2016 йилнинг энг кўп даромад келтирган актёри деб топди. Бу ҳақда TJournal хабар бермоқда.

Журнал муаллифларининг таъкидлашича, у бундай муваффақиятга Marvel студияси томонидан суратга олинган ягона фильм туфайли эришган. «Биринчи қасоскор: Қарама-қаршилик» картинасини суратга олишда актёр учун сарфланган ҳар бир доллар ўртача 135,8 доллар даромад келтирганлиги таъкидланмоқда. Бюджети 250 миллион долларни ташкил этган фильм прокатда 1 миллиард доллардан ортиқ пул ишлаб топди.

2016 йилда «Қойилмақом еттилик» ва «Йўловчилар» илмий-фантастик фильмида суратга тушган актёр Крис Пратт рейтингнинг иккинчи ўрнидан жой олди. «Юра даври олами» картинаси актёр муваффақиятининг асосий қисмини таъминлади. Уни суратга олишда Крис учун сарфланган ҳар бир доллар 125 доллар даромад келтирди.

Рейтингдан, шунингдек, Скарлетт Йоханнсон (3-ўрин) ва кичик Роберт Дауни (8-ўрин) жой эгаллади.

Бир йил олдин Крис Эванс «Қасоскорлар: Альтрон Эраси» ва «Биринчи қасоскор: Бошқа уруш» фильмлари билан киностудияларга ҳар бир сарфланган доллар учун 181,8 доллар фойда келтирганди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.