Япония парламентининг Вакиллар палатаси 26-сентябр, душанба куни очилган навбатдан ташқари сессиясида Шимолий Кореядаги ядровий синовларни қораловчи резолюцияни бир овоздан қабул қилди. Бу ҳақда «ТАСС» хабар бермоқда.
«Биз Шимолий Кореянинг ҳаракатларини кескин қоралаймиз ва халқаро ҳамжамият билан биргаликда БМТ Хавфсизлик кенгашининг янги резолюцияси қабул қилинишига эришиш йўлидаги уринишларимизни давом эттирамиз», — дея таъкидлади навбатдан ташқари сессияни очиб берган бош вазир Синдзо Абэ.
Абэ Япония бу борада Россия ва Хитой билан яқиндан ҳамкорлик қилишини билдирди.
Эслатиб ўтамиз, 9 сентябрь куни Шимолий Корея ўз тарихидаги бешинчи ядровий синовни ўтказди. Мутахассисларнинг сўзларига кўра, бу мамлакат тарихидаги энг йирик ядровий синов бўлган, КХДР раҳбарияти эса энди ядровий каллакларни баллистик ракеталарга ўрната олишини маълум қилди.
Жанубий Корея ҳарбийларининг фикрича, КХДР октябрь ойининг биринчи ўн кунлигида навбатдаги ядровий синовларни ўтказишга тайёргарлик кўраётган бўлиши мумкин.
Изоҳ (0)