Нью-Йорк полицияси 27 апрель, чоршанба куни шаҳар тарихидаги энг йирик жиноий тўда аъзолари ҳибсга олинганлигини маълум қилди. Бу ҳақда «Интерфакс» хабар беради.

Нью-Йорк шаҳри ва АҚШнинг бошқа ҳудудларини қўрқитиб келган 120 киши полиция қўлига тушди.

«Бронксда йирик жиноий тўда аъзоларини қўлга олиш бўйича операция муваффақиятли ўтди», — дейилади Нью-Йорк полиция Департаменти хабарида.

Полиция 27 апрель куни эрта тонгда қотиллик, ўқотар қурол қўллаш, ўғрилик, банк фирибгарлиги, рэкет ва гиёҳвандлик воситалари савдосида гумонланаётган гуруҳ аъзоларини қуршаб, уларни ҳибсга олди.