Индонезияда ноқулай об-ҳаво шароити туфайли ҳарбий вертолёт ҳалокатга учради

20 март, якшанба куни Сулавеси оролида Индонезия ҳарбий-ҳаво кучлари вертолёти ҳалокатга учради, дея хабар бермоқда «ТАСС». Оқибатда 13 киши нобуд бўлди.

Мамлакат ҲҲК қўмондонлиги вакили сўзларига кўра, вертолёт қулашига ноқулай об-ҳаво шароити сабаб бўлган. У ўзи қўнмоқчи бўлган Посо шаҳридаги аэропортга етишига ўн дақиқа қолганида ҳалокатга учраган.

Айни пайтда 13 нафар қурбоннинг шахсини аниқлаш ишлари якунланмоқда. Бортда Марказий Сулавеси провинцияси ҳарбий қўмондонлиги вакиллари, маҳаллий разведка бошқармаси ходимлари, шунингдек, юқори лавозимли полициячилар бўлган. Улар провинциянинг ушбу ҳудудида бўлиб ўтаётган йирик кўламли аксилтеррорчилик операциясида қатнашаётган бўлган.