Бухоро вилояти Шофиркон тумани Ички ишлар бўлими ходимлари томонидан маст ҳолда талончилик қилган шахс қўлга олинди. Бу ҳақда «Постда» газетасига асосланиб «Kun.uz» хабар бермоқда.
Шофиркон туманида истиқомат қилувчи Шуҳрат улфатчиликдан келган бўлса-да, ичкилик камлик қилади. У ўйлаб ўтирмай жияниникига йўл олади. Жиянининг уйда йўқлигидан ҳафсаласи пир бўлаёзган Шуҳратнинг хаёлига таниши Раъно келади. У жияни билан қўшни эди. Раънонинг уйига келган Шуҳрат зиёфат устидан чиқиб қолади. Раънонинг меҳмони бор эди. У ўзини Эгамберди деб таништиради.
Зиёфат охирлаётган маҳал, Раъно Эгамбердидан ошхона ишчиси учун пул тўлаб юборишини сўрайди. Меҳмон чўнтагини кавлаган эди, бир даста АҚШ доллари чиқди. Пулларни кўрган Шуҳратнинг нияти бузилади ва Эгамберди билан жанжал чиқаради. Мезбон уларни ажратиб, Шуҳратдан кетишини сўрайди. Бироз вақт ўтгач, Эгамберди ҳам меҳмондорчиликдан чиқади. Бу вақтда Шуҳрат уни кўчада кутиб турган эди. Эгамберди жанжаллашишга уринаётган Шуҳратга жавоб қайтармайди ва дўстига телефон қилиб гаплашаётган вақтда Шуҳрат унинг чўнтагига қўл тиқиб, пулларни юлқиб олади ҳамда қочиб кетади.
Эгамберди ҳудуд профилактика инспектори орқали ИИБ навбатчилик қисмига ушбу хабарни этказади. Суриштирув-қидирив ишлари натижасида Шуҳрат тезда қўлга олинди. Жабрланувчига тегишли пуллар қайтарилди. Шу билан бирга, унга етказилган зарар ундирилди. Суд эса Шуҳратнинг қилмишига яраша жазо тайинлади.
Изоҳ (0)